նախընտրելի դարձնելԳվինեա-Բիսաուում իշխանությունը զավթած զինվորականները ազատել են իրենց կողմից ավելի վաղ ձերբակալված նախագահի պարտականությունները կատարող Ռայմունդո Պերեյրոյին եւ նախկին վարչապետ Կարլուշ Գոմեշ Ժունիորին: Ապրիլի 27-ի երեկոյան նրանք ժամանել են Կոտ դ’Իվուար , հաղորդում է AFP-ը:
Գվինեա-Բիսաուի նախկին առաջնորդների ազատ արձակումն ավելի վաղ պահանջել էր Արեւմտյան Աֆրիկայի երկրների տնտեսական համագործակցությունը (ԷԿՕՎԱՍ):
Նաեւ ապրիլի 27-ին Գվինեա-Բիսաուի խունտան հայտարարել էր, որ անցումային շրջանի ժամկետը կկրճատի 2 տարվանից մինչեւ 12 ամիս: Բացի դրանից, զինվորականները հավանություն են տվել երկրում ԷԿՕՎԱՍ-ի զորքերի տեղակայմանը, հաղորդում է ՌԻԱ Նովոստին:
Նախօրեին Էկովասը որոշում էր կայացրել զորքեր ուղարկել Մալի եւ Գվինեա-Բիսաու, որպեսզի վերահսկի այդ երկրներում քաղաքական ճգնաժամի խաղաղ կարգավորումը:
Հիշեցնենք, որ Գվինեա-Բիսաուում պետական հեղաշրջումը տեղի էր ունեցել ապրիլի 12-ին` ապրիլի 29-ին նախատեսված նախագահական ընտրությունների երկրորդ փուլի նախաշեմին:
Ինչպես ավելի վաղ հայտնել էր NEWS.am-ը, զինվորները եւ սպաները ձերբակալել էին երկրի ժամանակավոր նախագահ Ռայմունդո Պերեյրոյին եւ վարչապետ Կարլուշ Գոմեշ Ժունիորին: Տեղական բանակի հրամանատարությունը հայտարարություն էր տարածել, որում ասվում էր իշխանությունն իրենց ձեռքերում պահելու անցանկալիության եւ այն շուտով քաղաքացիական կառավարությանը փոխանցելու մտադրութան մասին: Ըստ զինվորականների` նրանք ստիպված են եղել տապալել գործող իշխանությունը, քանի որ իմացել էին երկրի ղեկավարության եւ Անգոլայի միջեւ դավադրության մասին:
