Հայաստանի կենսաթոշակային կուտակային հիմնադրամներում առկա է ավելի քան 1 տրիլիոն դրամի միջոցներ, որոնց առնվազն 60%-ը ներդրված է հանրապետության տնտեսության մեջ։ Այս մասին մայիսի 5-ին Ազգային ժողովի նիստում ՀՀ Կենտրոնական բանկի նախագահի ընտրության հարցի քննարկման ժամանակ հայտարարել է ԿԲ գործող նախագահ և թափուր պաշտոնի թեկնածու Մարտին Գալստյանը՝ պատասխանելով ընդդիմադիր «Հայաստան» խմբակցության քարտուղար Արծվիկ Մինասյանի հարցին։

Պատգամավորը, մասնավորապես, ԿԲ նախագահից հետաքրքրվել էր, թե տվյալ պահին որքան է կազմում կուտակային կենսաթոշակային հիմնադրամների միջոցների ծավալը, դրանց որ մասն է ներդրված Հայաստանի տնտեսության մեջ և ինչ քայլեր են ձեռնարկվում մասնավոր կենսաթոշակային հիմնադրամների զարգացման ուղղությամբ։

Գալստյանի հավաստմամբ՝ կուտակային կենսաթոշակային հիմնադրամներում եղած միջոցներն արդյունավետ և նպատակային են օգտագործվում։ «Երկրի տնտեսության մեջ ներդրված այս միջոցների դինամիկան մշտապես փոխվում է, և դա բնական է։ Ես կարծում եմ, որ այս միջոցներն իսկապես ծառայում են Հայաստանի տնտեսությանը։ Ազգային ժողովի կողմից ընդունված վերջին փոփոխությունների շնորհիվ, որոնք հիմնադրամներին թույլ են տվել տնտեսության իրական հատվածում ներդնել 10%, մենք կարող ենք տեսնել առաջին արդյունքները», - ասել է Կենտրոնական բանկի նախագահը։

Նա նշել է, որ խոսքը «Firebird» նախագծի մասին է, որի ֆինանսավորման մի մասն ապահովվել է Հայաստանի երկու կենսաթոշակային հիմնադրամների կողմից։ «Փողը շատ է։ Մեզ անհրաժեշտ են իսկապես լավ նախագծեր, որոնք սիրով կֆինանսավորեն կենսաթոշակային հիմնադրամները», - ամփոփել է Մարտին Գալստյանը։

Հիշեցնենք, որ, ըստ այս տարվա փետրվարին Կենտրոնական բանկի հրապարակած վիճակագրության, Հայաստանի կուտակային կենսաթոշակային հիմնադրամների ընդհանուր ակտիվները 2025 թվականին աճել են 367 մլրդ դրամով (մոտ 960 մլն դոլար) կամ 34%-ով՝ հասնելով 1 տրլն 441 մլրդ դրամի (մոտ 3 մլրդ 762 մլն դոլար)։