նախընտրելի դարձնել«Բարգավաճ Հայաստան» կուսակցության առաջնորդ Գագիկ Ծառուկյանը մի շարք հայտարարություններով է հանդես եկել Արագածոտնի մարզ կատարած տարածաշրջանային այցի ընթացքում, որտեղ հանդիպումներ է ունեցել Հնաբերդ գյուղի և հարակից բնակավայրերի բնակիչների հետ։
Ծառուկյանի խոսքով՝ նման այցերի ձևաչափը հնարավորություն է տալիս անմիջականորեն լսել քաղաքացիների խնդիրները՝ առանց միջնորդների։ Բաց ձևաչափով անցկացված հանդիպումները ուղեկցվել են ակտիվ երկխոսությամբ․ բնակիչները բարձրաձայնել են գյուղատնտեսության, սոցիալական անարդարության, զբաղվածության և ենթակառուցվածքների հետ կապված հարցեր։
Ծառուկյանը ընդգծել է, որ այսօր գյուղական համայնքները գտնվում են ամենախոցելի վիճակում։ Նրա խոսքով՝ գյուղերի մեծ մասում խնդիրների շրջանակը նույնն է՝ բարձր վարկային բեռ, մատչելի վարկավորման բացակայություն, գյուղտեխնիկայի պակաս, վատ ճանապարհներ և անասնապահության ծավալների նվազում։
«Գյուղացին մեր երկրի ուժն է, և մենք իրավունք չունենք նրան անուշադրության մատնելու։ Այսօր մարդիկ հոգնել են դատարկ խոստումներից և սպասում են իրական քայլերի», — հայտարարել է նա՝ դիմելով բնակիչներին։
Հանդիպման ընթացքում գյուղացիները նշել են, որ կյանքի պայմանները վատթարանում են․ եկամուտները նվազում են, անասնագլխաքանակը կրճատվում է, իսկ երիտասարդները լքում են գյուղերը։ Առանձին քննարկվել են նաև շուկաների հասանելիության, արտադրանքի պահպանման և պետական աջակցության բացակայության խնդիրները։
Քաղաքական գործիչը քննադատել է նաև գործող վարկային համակարգը՝ ընդգծելով, որ գյուղատնտեսության համար տոկոսադրույքները շարունակում են չափազանց բարձր մնալ։ Նրա խոսքով՝ զարգացած երկրներում ֆերմերները վարկեր են ստանում արտոնյալ պայմաններով՝ մինչև զրոյական տոկոսադրույք, ինչպես նաև ստանում են պետական սուբսիդիաներ։
Առանձնահատուկ ուշադրություն Ծառուկյանը դարձրել է երկրի կառավարման հարցին։ Նա հայտարարել է, որ Հայաստանին անհրաժեշտ է պրոֆեսիոնալ թիմ, որը կկարողանա արդյունավետ լուծել կուտակված խնդիրները։
«Մենք իրավունք չունենք պատասխանատու պաշտոններում նշանակել պատահական մարդկանց։ Երկրին անհրաժեշտ են փորձառու մասնագետներ, որոնք հասկանում են համակարգը և կարող են պատասխանատվություն կրել իրենց որոշումների համար», — նշել է նա։
ԲՀԿ առաջնորդի կարծիքով՝ զարգացման հիմնական գործոնը պետք է լինի կառավարման կոմպետենտությունը, ոչ թե քաղաքական կոնյունկտուրան։
Հանդիպման ընթացքում անդրադարձ է կատարվել նաև սոցիալական արդարության թեմային։ Բնակիչները դժգոհություն են հայտնել պաշտոնյաների բարձր պարգևավճարներից՝ սոցիալական ոլորտում ցածր աշխատավարձերի ֆոնին։ Ծառուկյանը աջակցել է այդ քննադատությանը՝ ընդգծելով պետական միջոցների ավելի արդար բաշխման անհրաժեշտությունը։
«Չի կարող լինել այնպես, որ մեկը միլիոններ ստանա, իսկ ուսուցիչն ու զինծառայողը՝ նվազագույն աշխատավարձ։ Աջակցությունը պետք է համաչափ լինի յուրաքանչյուրի ներդրմանը», — հայտարարել է նա։
Առանձին քննարկման թեմա է դարձել նաև երիտասարդությունը։ Քաղաքական գործիչը կարևորել է երիտասարդ մասնագետների ինքնաիրացման համար պայմանների ստեղծումը երկրի ներսում։ Նա օրինակ է բերել երիտասարդների աջակցմանն ուղղված նախաձեռնությունները՝ ընդգծելով, որ հենց երիտասարդությունն է երկրի ապագան։
Բացի այդ, հանդիպման ընթացքում բարձրացվել են նաև մարզերում սպորտի և ենթակառուցվածքների զարգացման հարցեր։ Բնակիչները նշել են, որ, չնայած տաղանդավոր երեխաների առկայությանը, սպորտդպրոցների և համապատասխան պայմանների պակաս կա։ Ծառուկյանը խոստացել է դիտարկել խնդրի լուծման հնարավորությունները։
Քաղաքական գործիչը նաև կոչ է արել քաղաքացիներին ակտիվ մասնակցություն ունենալ ընտրություններին և հասարակական կյանքին՝ ընդգծելով, որ երկրի ապագան կախված է հենց մարդկանց ներգրավվածությունից։
«Յուրաքանչյուր մարդ պետք է մասնակցի որոշումների ընդունմանը։ Միայն այդպես կարելի է հասնել իրական փոփոխությունների», — նշել է նա։
Այցի ավարտին Ծառուկյանը հայտարարել է, որ շարունակելու է մարզային այցելությունները՝ երկրի իրավիճակի ավելի ամբողջական պատկեր կազմելու և զարգացման կոնկրետ առաջարկներ մշակելու նպատակով։
