Նախընտրելի«Дружба - дружбой, служба - службой». ի՞նչ կապ ունեն ընկերական հարաբերությունները աշխատանքային հարցերի հետ։ Եթե հարաբերությունները ընկերական են, արդյո՞ք դա նշանակում է, որ մենք պետք է դուրս գանք ֆիտոսանիտարական ստանդարտներով նախատեսված նորմերից։ Այս մասին այսօր՝ մայիսի 22-ին լրագրողների հետ հանդիպման ժամանակ հայտարարել է արձակուրդում գտնվող Հայաստանի վարչապետ Նիկոլ Փաշինյանը, որը գլխավորում է ՔՊ–ի համամասնական ցուցակը՝ պատասխանելով NEWS.am-ի հարցին այն մասին, թե եթե նա ընկերություն է անում Պուտինի հետ, ապա ինչպես է ստացվել, որ խնդիրներ են առաջացել արտահանման հետ կապված, և քննարկվում է Հայաստանի կարգավիճակը ԵԱՏՄ-ում։
Նրա խոսքով՝ Հայաստանի կարգավիճակի հարցը ԵԱՏՄ-ում կարող է քննարկել միայն Հայաստանը, այսինքն՝ միայն Հայաստանը կարող է որոշել՝ դուրս գալ, թե ոչ։ «Այլ ընթացակարգ չկա։ Միաժամանակ մենք պատրաստ ենք պատասխանել այլ հարցերի ևս», — նշել է նա։
Փաշինյանը վստահեցրել է, որ գազը չի կարող թանկանալ, քանի որ գործում է փոխշահավետ պայմանագիր։ «Գազի սակագնի մասով մենք ավելի վաղ հասել ենք հստակ ռազմավարական պայմանավորվածությունների, և դրանք պետք է պահպանվեն»։
«Ծաղիկների արտահանման սահմանափակումներ միշտ եղել են, քանի որ ցանկացած ապրանքի համար, որը չի համապատասխանում ֆիտոսանիտարական ստանդարտներին, սահմանափակումներ միշտ եղել են և միշտ էլ կլինեն։
8 տարվա ընթացքում նման տասնյակ դեպքեր են եղել։ Եղել են նաև այլ խնդիրներ, որոնք վերաբերում էին այլ ապրանքների։ Եվ ԵԱՏՄ-ում մենք մշտապես քննարկում ենք ներմուծվող և արտահանվող ապրանքների ծագման հարցը։ Տրամաբանությունն այն է, որ ԵԱՏՄ-ում արտադրվող ապրանքները պետք է ազատ տեղաշարժվեն ԵԱՏՄ երկրների միջև։ Այս հարցը մշտապես քննարկվում է Միության բոլոր երկրների հետ կապված», — նշել է Փաշինյանը։
Նա մատնանշել է այն հարցի հստակեցման կարևորությունը, թե Ռուսաստան ներմուծվող ծաղիկների ինչ քանակն է արտադրվում ԵԱՏՄ երկրներում։
«Այժմ Հայաստանում գտնվում է պատվիրակություն։ Եվ տասնյակ պատվիրակություններ այցելում են ԵԱՏՄ տարբեր երկրներ», — եզրափակել է Փաշինյանը։
