ՆախընտրելիԵրկրի զարգացման հստակ ծրագրեր ներկայացնելու և տարիների ձախողումների համար հաշվետվություն տալու փոխարեն՝ իշխող ռեժիմը գործի է դրել ողջ ռեպրեսիվ ապարատը՝ նախընտրական քարոզարշավը վերածելով սպառնալիքների, շանտաժի և քաղաքական ահաբեկչության կոնվեյերի։ Այս մասին մայիսի 23-ին Երևանի Արաբկիր վարչական շրջանում նախընտրական քարոզարշավի ընթացքում հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանի մամուլի խոսնակ Իվետա Տոնոյանը։
Քաղաքական գործիչն ուշադրություն է հրավիրել աննախադեպ վարչական և ուժային ճնշման վրա, որին այս ընտրություններում բախվում են ընդդիմության ներկայացուցիչները։ Տոնոյանը նշել է, որ իշխանությունների կողմից գործի դրված լծակներն ու Գագիկ Ծառուկյանի թիմին ահաբեկելու փորձերը դատապարտված են լիակատար ձախողման, քանի որ նրանց թիկունքում կանգնած է հարյուր հազարավոր հայրենակիցների վստահությունը։ Տոնոյանի խոսքով՝ քաղաքական ուժի ոգին ամուր է, կամքն՝ անկոտրում, գործը՝ արդար, քանի որ նրանց նպատակներն ուղղված են պետության փրկությանն ու ստեղծարար կառուցմանը։
Իվետա Տոնոյանը կոչ է արել Արաբկիրի բնակիչներին չտրվել իշխող վերնախավի ագրեսիվ հռետորաբանությանը և կատարել գիտակցված ընտրություն՝ հօգուտ կայունության։ Նա ընդգծել է, որ կուսակցությունը միշտ գործով է ապացուցել իր հավատարմությունը ժողովրդի շահերին, իսկ ընդդիմախոսների կողմից հնչող հիստերիկ հաշվեհարդարի սպառնալիքները միայն մերկացնում են անխուսափելի պարտության հանդեպ նրանց սեփական վախը։ Մամուլի խոսնակը եզրափակել է, որ քաղաքացիների համախմբվածությունն ու Ծառուկյանի թիմի վճռական տրամադրվածությունը կդառնան պրոֆեսիոնալ կառավարության ձևավորման գլխավոր գրավականը, որը Հայաստան կվերադարձնի օրինականությունն ու երկարաժամկետ ներքին կայունությունը։
