նախընտրելի դարձնելԱյսօր Իրանում տեղական ժամանակով 08:00-ին սկսվել է խորհրդարանական ընտրությունների երկրորդ փուլի քվեարկությունը:
Օրենքին համապատասխան` քվեարկությունը կշարունակվի մինչեւ ժամը 18:00-ն, բայց անհրաժեշտության դեպքում ներքին գործերի նախարարը կարող է երկարաձգել քվեարկության ժամանակը:
Ընտրություններին մասնակցում են 130 թեկնածուներ 33 ընտրական տարածքներից: Նրանցից միայն 65-ը կանցնեն երկրի խորհրդարան:
Իրանի գերագույն առաջնորդ այաթոլլահ Ալի Խամենեին առաջիններից մեկն է քվեարկել երկրորդ փուլում: Խամենեին մարդկանց հորդորել է լուրջ վերաբերվել քվեարկությանը, ավելացնելով, որ երկրում խորհրդարանական ընտրությունների անցկացումը կարեւոր գործ է, հայտնում է «Կովկասի բանբերը»:
Իրանում խորհրդարանական ընտրությունների առաջին փուլն անցկացվել էր մարտի 2-ին: Իրանում խորհրդարանական ընտրությունները տեղի են ունենում 4 տարին մեկ անգամ: Նախորդ VIII գումարման խորհրդարանական ընտրությունները տեղի էին ունեցել 2008 թվականի մարտի 14-ին: Ալի Լարիջանիի նախագահությամբ խորհրդարանում ներկայումս կան 290 պատգամավորներ:
Նոր գումարման խորհրդարանի նստաշրջանը նախատեսվում է 2012 թվականի մայիսի 27-ին: մինչեւ խորհրդարանի նստաշրջանի բացումը պատգամավորները երդվում են: Մահմեդական պատգամավորները երդվում են Ղուրանի վրա, ազգային փոքրամասնությունների ներկայացուցիչները` իրենց սուրբ գրքի:
Ընդհանուր առմամբ, Իրանում ընտրելու իրավունք ունի 48 միլիոն մարդ:
