ՆախընտրելիԵս Հայաստանում ապրում եմ 1995 թվականի դեկտեմբերից, մասնակցել եմ համապետական բոլոր ընտրություններին և կարող եմ փաստել, որ երկու օր առաջ կայացած ընտրությունները բոլոր առումներով վատն էին, նույնիսկ՝ չափազանց վատ։ Այս մասին հունիսի 9-ին ֆեյսբուքյան իր էջի տեսաուղերձում հայտարարել է ՀՀ արտաքին գործերի նախկին նախարար Վարդան Օսկանյանը՝ ընդգծելով, որ 35-ամյա պատմություն ունեցող պետության համար անթույլատրելի է նման որակի ընտրական գործընթաց անցկացնելը։ Նա հատկապես դատապարտելի է համարել այն փաստը, որ այս խախտումները տեղի են ունենում գործող իշխանության օրոք, որը ժամանակին եկել էր հենց այն խոստումով, որ ամբողջությամբ կբացառի քաղաքացիների կամարտահայտության դեմ ուղղված ցանկացած ոտնձգություն։
Օսկանյանը նշել է, որ ընտրությունների ընթացքում դպրոցներում ու հիվանդանոցներում զանգվածաբար և բացահայտ կերպով կիրառվել է վարչական ռեսուրս, իսկ ուժային կառույցներն իրենց գործողությունները նույնիսկ չեն էլ փորձել թաքցնել։ Նախկին նախարարն ընդգծել է մի օրենք ընդունելու անհրաժեշտությունը, որը կառավարությանը կարգելի նախընտրական տարում բյուջեով չնախատեսված սոցիալական կամ առողջապահական նոր ծրագրեր սկսել՝ դա անվանելով ընտրողների քողարկված պետական կաշառում։ «Եթե այս ամենը շարունակվի, և ոչ մեկը պատասխանատվություն չկրի, մենք կհայտնվենք փակ շրջանի մեջ, և այս տարբերակով իշխանությունները կարող են հավերժ մնալ ղեկին»,- նշել է նա։ Արտաքին գործերի նախկին նախարարի գնահատմամբ՝ հրապարակված քվեարկության արդյունքները բացարձակապես չեն արտացոլում հանրության իրական տրամադրությունները։ Վարդան Օսկանյանը համոզմունք է հայտնել, որ առանց ապօրինի ճնշումների ու մանիպուլյացիաների՝ իշխող կուսակցության աջակցության իրական մակարդակը տատանվում է 30-40%-ի սահմաններում (ինչպես ցույց էին տալիս սոցհարցումները), իսկ 50%-ի շեմը հաղթահարելն արհեստականորեն է ստացվել՝ բոնուսների ու խորհրդարան չանցած ուժերի ձայների բաշխման հաշվին։ Օսկանյանն ուշադրություն է հրավիրել նաև գիշերային կոպիտ թվանկարչության վրա, որի պատճառով «Բարգավաճ Հայաստան» կուսակցությունը հանկարծակի հայտնվել է խորհրդարանից դուրս՝ ստանալով 3,996% ձայն։ «Մենք ԿԸՀ կայքում այլ թվեր էինք տեսնում, ես նույնիսկ լուսանկարել եմ այդ կադրը, սակայն հետո ցուցանիշները տոկոսի չնչին մասով փոխեցին, որպեսզի ընդդիմադիր ուժը չանցնի»,- ընդգծել է Վարդան Օսկանյանը։
Նա հավելել է, որ «Քաղաքացիական պայմանագիր» կուսակցության շտաբում հասկացել են, որ չունեն ոչ միայն սահմանադրական մեծամասնություն, այլև նույնիսկ ձայների երեք հինգերորդը։ Հենց դա էլ նրանց դրդել է գնալ «միկրոսկոպիկ» կեղծիքների՝ թաքցնելով իրական տվյալները։ Այս արդյունքների հիման վրա նախկին նախարարը եզրակացրել է, որ հայ ժողովուրդը հստակ «ոչ» է ասել վարչապետի կոչերին և իշխող թիմին զրկել առանցքային բարեփոխումներ իրականացնելու լեգիտիմ իրավունքից։ «Հայ ժողովուրդը թույլ չի տվել այս իշխանություններին փոխել Սահմանադրությունը, և նրանք իրավունք չունեն ձեռք տալ Մայր օրենքին»,- փաստել է Օսկանյանը։ Նախկին նախարարը շեշտել է նաև, որ կառավարությունը լիազորված չէ թիրախավորել Հայ Առաքելական Եկեղեցին կամ անկլավների պատրվակով Ադրբեջանին հանձնել Հայաստանի ինքնիշխան տարածքից անգամ մեկ սանտիմետր։
Վարդան Օսկանյանը հիշեցրել է, որ հանրապետությունում ադրբեջանական ոչ մի անկլավ գոյություն չունի, այլ կան միայն հայկական հողեր, որոնք Բաքուն ապօրինի կերպով պահում է իր վերահսկողության տակ ռազմական ներխուժումից հետո։ Ամփոփելով խոսքը՝ նա քաղաքացիներին, բոլոր քաղաքական ու ազգային ուժերին կոչ է արել միավորվել և վճռական դիմադրություն ցույց տալ իշխանությունների հետագա հակապետական քայլերին՝ դրա համար գործադրելով օրենքի և Սահմանադրության շրջանակներում առկա ողջ գործիքակազմը։
