նախընտրելի դարձնելՖրանսիայի գործող նախագահ, «Միություն հանուն ազգային շարժման» կուսակցության առաջնորդ Նիկոլա Սարկոզին նախագահական ընտրությունների երկրորդ փուլում քվեարկել է Փարիզի շրջանի 16-րդ տեղամասում` իր եւ կնոջ` Կարլա Բրունի-Սարկոզիի հաշվառման վայրում: Կարլան ուղեկցել է նրան:
Նախագահի թեկնածուին դիմավորել է կողմնակիցների եւ լրագրողների ամբոխը: Ն. Սարկոզի շուրջը քաոսային իրարանցում է սկսվել նրա երեւալու պահին, ինչը նրա թիկնազորին նյարդայնանալու տեղիք է տվել:
Նախագահը հասցրել է մի քանի ձեռք սեղմել, մինչեւ շանք մտնելը, որտեղ եւս շարունակվել են ձեռքսեղմումները, հայտնում «Ինտերֆաքսը»` հղում անելով ֆրանսիական լրատվամիջոցներին:
«ՌԻԱ Նովոստին» հայտնում է, որ ընտրատեղամասին մոտենալով, Սարկոզին անվտանգության ծառայությունների համար անսպասելի մտել է զբոսայգին, որպեսզի սեղմի իր համախոհների ձեռքերը, որոնք հավաքված են եղել ճանապարհի մյուս մասում. երթեւեկությունը դադարեցված է եղել:
Սարկոզին քվեաթերթիկն արկղի մեջ է գցել Կարլա Բրունի-Սարկոզիից հետո` խցիկների եւ լուսանկարիչների առաջ հատուկ դիրք չընդունելով, եւ անմիջապես դեպի ելքն է շտապել:
Մինչ հեռանալը Սարկոզին կրկին ուղեւորվել է իր համախոհներին ողջունելու:
Երեկոյան Սարկոզին ելույթ կունենա դրա համար հատուկ վարձակալված սրահում, որը գտնվում է Փարիզի 5-րդ շրջանում:
