նախընտրելի դարձնելՀայաստանում անցկացված խորհրդարանական ընտրությունները համապատասխանում են միջազգային ստանդարտներին: Այդ մասին մայիսի 7-ին հայտարարել է ICES ընտրական համակարգերի փորձագիտական կենտրոնի դիտորդ Լիդիա Լոուսոնը:
Նրա խոսքով` ընտրություններին քվեարկության գործընթացն անցել է առանց խախտումների: Միաժամանակ նա նշել է, որ որոշ ընտրատեղամասերում ընտրական հանձնաժողովների աշխատանքի կազմակերպման ընթացքում բացթողումներ են եղել, եղել են դեպքեր, երբ վստահված անձինք միջամտել են ընտրական գործընթացին: «Եղել են դեպքեր, երբ քաղաքական ուժերի որոշ ներկայացուցիչներ սխալ մոտեցում են ցուցաբերել»:
Լոուսոնը նաեւ նշել է, որ շատ ընտրատեղամասերում տեխնիկական խնդիրներ են ծագել` կապված քվեարկող քաղաքացիների անձնագրերի կնիքների հետ, որոնք անհետացել են 2 ժամ անց, սահմանված 12 ժամի փոխարեն: Դիտորդը նաեւ նշել է, որ իրավիճակը կայունացվել է կնիքների համար թանաքը փոխելուց հետո:
Ըստ նրա` կազմակերպխության դիտորդների ներկա գտնված բոլոր ընտրատեղամասերում ընտրական հանձնաժողովների անդամները հարգանքով են վերաբերվել դիտորդներին: Նշենք, որ առաքելությունն ընտրատեղամասեր էր այցելել երկրի խոշոր քաղաքներում` Երեւանում, Գյումրիում, Վանաձորում, Աբովյանում, Արտաշատում:
Նշենք, որ մայիսի 6-ին Հայաստանում տեղի ունեցան 5-րդ գումարման Ազգային ժողովի ընտրությունները: Խորհրդարանում կա 131 պատգամավոր, օրենսդիր մարմինը ձեւավորվում է խառը ընտրական համակարգով` 90 մանդատ համամասնական ցուցակով, 41` մեծամասնական: Ընթացիկ խորհրդարանական ընտրություններին մասնակցել են 8 քաղաքական կուսակցություններ` Հայաստանի Հանրապետական կուսակցություն, «Բարգավաճ Հայաստան», «Օրինաց երկիր», «Ժառանգություն», Հայաստանի կոմունիստական կուսակցություն, Հայ հեղափոխական դաշնակցություն, Հայաստանի դեմոկրատական կուսակցություն, «Միավորված հայեր», եւ մեկ բլոկ` Հայ ազգային կոնգրեսը: Քվեարկության մոնիտորինգն անցկացրել են 31 418 դիտորդներ 53 տեղական կազմակերպություններից, ինչպես նաեւ Հայաստանում հավատարմագրված 11 տարբեր միջազգային կազմակերպությունների եւ դեսպանությունների 647 ներկայացուցիչներ:
