նախընտրելի դարձնելFacebook-ը նախապես ծրագրվածից 25%-ով ավելի բաժնետոմսեր դուրս կբերի IPO: Այդ որոշումը պայմանավորված է առկա մեծ պահանջարկով: Առաջարկը կընդլայնվի 337,4 մլն բաժնետոմսերից մինչեւ 422 մլն: Դրանք միջին գնով` 36 դոլարով իրացնելու դեպքում ընկերությունը կարող է ավելի քան 15 մլրդ դոլար ստանալ:
Ինչպես հաղորդել էր NEWS.am-ը, Facebook Inc. ընկերությունն ավելացրել էր արժեթղթերից յուրաքանչյուրի արժեքը` 28-35 դոլարից հասցնելով 34-38-ի: IPO-ի շրջանակում նախատեսվում էր վաճառքի հանել 337,4 մլն բաժնետոմսեր:
Բայց արդեն նախօրեին հայտարարվել էր, որ եթե բաժնետոմսերի պահանջարկը բարձր լինի, աճուրդի կհանվեն եւս 50 մլն բաժնետոմսեր:
IPO ներկայացնելու լուրերին զուգահեռ վիճում են, թե որքանով է դա հուսալի դարձնում Facеbook-ը: Այսպես, մայիսի 15-ին General Motors-ը հայտարարել է, որ Facebook-ից մտադիր է հետ կանչել իր վճարովի գովազդը, գրում է «Վեդոմոստին»:
Ավտոարտադրողի շուկայագետները նկատել են, որ սոցցանցում վճարովի գովազդը գործնականում ազդեցություն չի ունենում ավտոմեքենաների վաճառքի վրա: Միաժամանակ GM-ը կշարունակի օգտագործել Facebook-ի բրենդային էջերը, որոնց բովանդակության տեղակայումն անվճար է:
