Սպիտակ տունն իր պաշտոնական կայքում տեղադրել է մինի-խաղերով բաժին, որը նվիրված է ԱՄՆ նախագահ Դոնալդ Թրամփի վարչակազմի որոշումներին և նախաձեռնություններին։

Ներկայումս օգտատերերին հասանելի է հինգ խաղ։ Դրանցից մեկը՝ Flappy Bill-ը, ստեղծվել է հանրահայտ Flappy Bird բջջային խաղի մոտիվներով։ Դրանում խաղացողը կառավարում է սպիտակագլուխ արծվին, որը տանում է օրինագիծ՝ խուսափելով խոչընդոտներից, որոնք ներկայացված են Սպիտակ տան սյուները հիշեցնող հուշարձանների տեսքով։

Մյուս խաղը՝ «Կառուցիր պատը», կրկնում է «Տետրիսի» մեխանիկան․ օգտատերը պետք է դասավորի բլոկները, որպեսզի պատ կառուցի ԱՄՆ-ի և Մեքսիկայի սահմանին։ Խաղի նպատակն է պաշտպանել տարածքը զոմբիների «հարձակվող հորդայից»։

Մեկ այլ նախագիծ՝ «Փախուստ Ռիոյի միջով», հիմնված է «Օձիկ» խաղի սկզբունքների վրա, որտեղ կերպարը շարժվում է դաշտով և հավաքում է միգրանտներ հիշեցնող ուրվագծեր։ Արկադայի գործողությունը տեղի է ունենում Ռիո Գրանդե գետի երկայնքով, որով անցնում է Միացյալ Նահանգների և Մեքսիկայի սահմանը։

Էջում ներկայացված են նաև առողջապահության ոլորտի նախաձեռնությունների հետ կապված խաղեր։ Դրանցից մեկում՝ «Մատակարարման գծեր», օգտատիրոջը առաջարկվում է կոնվեյերից հեռացնել վնասակար սնունդը, որպեսզի այն չհայտնվի դպրոցներում։ Դրա կարգախոսը՝ «Ամերիկան կրկին առողջ դարձնենք», հղում է անում այն արշավին, որն առաջ է մղում ԱՄՆ առողջապահության նախարար Ռոբերտ Քենեդի կրտսերը։

Մեկ այլ խաղում, որը կոչվում է «Թրամփի խնայողությունների կայսրություն», պետք է ցանցով որսալ Սպիտակ տան շենքի մոտ ընկնող առարկաները և դրանից գումար վաստակել։ Կայքում նշվում է, որ մշակման փուլում է ևս մեկ արկադա։ Թողարկման ամսաթիվը չի հստակեցվում։

Էջի առաջխաղացմամբ զբաղվել են նաև X սոցիալական ցանցում Սպիտակ տան պաշտոնական հաշվում։ Հրապարակված հոլովակներում խաղերի բաժինը ոճավորված է Sega, PlayStation և Nintendo խաղային կոնսոլների լոգոտիպների նմանությամբ։