նախընտրելի դարձնել
Սեպտեմբերի 4-ին Բեռլինում անցկացվել են Ֆրիդրիխշտրասսեում գտնվող «Ռուսական գիտության և մշակույթի տան» փակման կողմնակիցների և հակառակորդների հանրահավաքներ, հաղորդում է DW-ն։
Շենքի առջև հավաքվել էին մոտ 500 մարդ, որոնք հանդես էին գալիս փակման դեմ։ Ակցիան կազմակերպել էին Սառա Վագենկնեխտի կուսակցությունը, Գերմանիայի կոմունիստական կուսակցությունը և «Ռուս-գերմանական բարեկամության ընկերությունը»։ Կարգախոսների թվում էին «Կանգնեցնել ռուսատյաց խելագարությունը» և «Դադարեցնել Ռուսաստանի նկատմամբ ագրեսիվ քաղաքականությունը»։
Մոտակայքում մոտ 250 մարդ պահանջել է փակել «Ռուսական տունը»։ Ակցիային մասնակցել են «կանաչների» կուսակցության ներկայացուցիչներ և ուկրաինամետ ակտիվիստներ։ Նրանք բերել էին հաստատության աշխատակիցների իրերի համար խորհրդանշական արկղեր և «Ճամպրուկ, կայարան, Մոսկվա» ու «Ո՛չ Կրեմլի քարոզչությանը» պաստառներ։ Եվս մեկ փոքր ակցիա էլ անցկացվել է ռուսաստանյան ընդդիմության մասնակցությամբ, որը օգտագործել է սպիտակ-կապույտ-սպիտակ դրոշներ։ Բոլոր երեք հանրահավաքներն անցկացվել են ոստիկանության ուժեղացված ներկայությամբ։
«Ռուսական տան» փակման մասին որոշումը Գերմանիայի իշխանությունները կայացրել են օգոստոսի 4-ին Լայպցիգ/Հալլե օդանավակայանում անօդաչու թռչող սարքի հետ կապված միջադեպից հետո։ Բեռլինը հարձակման փորձի պատասխանատվությունը բարդել է Ռուսաստանի վրա և որպես պատասխան միջոց որոշել է նաև փակել Ռուսաստանի գլխավոր հյուպատոսարանը Բոննում։ Ռուսաստանը մերժել է մեղադրանքները։
Գերմանիայի արտգործնախարար Յոհան Վադեֆուլը հայտարարել է, որ «Ռուսական տունը» վաղուց դադարել է կատարել Ռուսաստանի և Գերմանիայի միջև մշակութային փոխանակման գործառույթը։ Ի պատասխան՝ Մոսկվան հայտարարել է Ռուսաստանում Goethe-Institut-ի մասնաճյուղերի փակման մասին։ Այս մասին հայտնել է ՌԴ ԱԳ նախարար Սերգեյ Լավրովը։
