Ֆրանսիայում ներքին քննություն է սկսվել այն բանից հետո, երբ հինդուիստական կրոնական պատվիրակության այցելության ընթացքում Էյֆելյան աշտարակի կին աշխատակիցներին խնդրել են լքել իրենց աշխատատեղերը։ Տեսարժան վայրի ղեկավարությունը տեղի ունեցածն անվանել է «ցնցող և անընդունելի», հայտնում է BBC News-ը։

Շաբաթ օրը Փարիզի Էյֆելյան աշտարակ է այցելել հինդուիստական BAPS (Բոչասանվասի Ակշար Պուրուշոտամ Սվամինարայան Սանսթհա) շարժման հետ կապված շուրջ 100 մարդ։ Արհմիության ներկայացուցիչ Դիանա Դավուանի խոսքով՝ աշխատակցուհիներին խնդրել են հեռանալ իրենց աշխատատեղերից, ինչպես նաև պատվիրակության գտնվելու ընթացքում չանցնել որոշակի գոտիներով։ Կանայք իրենց նվաստացած են զգացել։

Երկուշաբթի Էյֆելյան աշտարակի աշխատակիցները գործադուլ են հայտարարել։ Օբյեկտի ղեկավարությունն ավելի վաղ ընդունել էր, որ այցի համար սահմանված պայմանները չեն համապատասխանել իրենց արժեքներին և կանանց ու տղամարդկանց հավասարության սկզբունքներին։

Էյֆելյան աշտարակը կառավարող ընկերության նախագահ Աղիել Վեյլը հայտարարել է, որ մենեջերները չափազանցված ջանասիրություն են ցուցաբերել՝ համաձայնելով պատվիրակության պահանջներին՝ առանց գնահատելու դրանց տեղին լինելը։ Նա ընդգծել է, որ տեղի ունեցածը «լիովին ցնցող է և անընդունելի»։

Վեյլը հայտնել է ներքին քննություն սկսելու մասին, որը պետք է պարզի, թե ով է պատասխանատու եղել այցի կազմակերպման համար և ինչու են սահմանափակումներ մտցվել աշխատակցուհիների նկատմամբ։ Նրա խոսքով՝ անհրաժեշտ է երաշխավորել, որ նման բան այլևս չի կրկնվի։

BAPS-ը խստորեն տարանջատում է տղամարդկանց և կանանց, այդ թվում՝ տաճարային արարողությունների ժամանակ և շենքեր մուտք գործելիս։ Շարժումը նման պրակտիկան բացատրում է կանանց հանդեպ հոգատարությամբ, սակայն քննադատները նման սահմանափակումները համարում են խտրական և անհամատեղելի հավասարության ժամանակակից ընկալումների հետ։

Ինքը՝ շարժումը, հայտարարել է, որ այցելությունը կազմակերպվել է Էյֆելյան աշտարակի թիմի հետ համատեղ՝ սովորական աշխատանքային ժամի սկզբում, որպեսզի անհանգստություն չպատճառվի մյուս այցելուներին։ BAPS-ը հայցել է ներողամտություն հնարավոր «ցավի կամ անհարմարության» համար և ընդգծել, որ հավատարիմ է փոխադարձ հարգանքի ու ծառայության համամարդկային արժեքներին։

Միջադեպը ֆրանսիացի քաղաքական գործիչների կտրուկ արձագանքն է առաջացրել։ Ֆրանսիայի Ազգային ժողովի նախագահ Յաել Բրաուն-Պիվեն հայտարարել է, որ թույլ չի տա կանանց ստիպել մի կողմ քաշվել՝ հանուն օտարերկրյա այցելուների պահանջների։

Ֆրանսիական աջերի առաջնորդ Մարին Լը Պենը նույնպես դատապարտել է տեղի ունեցածը՝ հայտարարելով, որ Ֆրանսիայում երբեք համաձայն չեն լինի կանանց ներկայության սահմանափակմանը։ Նախկին վարչապետ Գաբրիել Ատալն ընդգծել է, որ Ֆրանսիայում ոչ մշակույթը, ոչ համոզմունքները, ոչ էլ կրոնը չեն կարող կանանց մատնանշել, թե «որն է իրենց տեղը»։

Կիրակի օրը BAPS-ը Փարիզի արվարձաններից մեկում բացել է Ֆրանսիայում իր առաջին խոշոր տաճարը։