Ղազախստանի ՆԳՆ-ն, ավիացիայի կիրառմամբ, իրականացնում է «Կարասորա-2026» կանխարգելիչ գործողությունը՝ թմրամիջոցների պատրաստումն ու տարածումը խափանելու նպատակով։ Միջոցառման ընթացքում առգրավվել է 21 տոննա արգելված նյութ։ Ինչպես հայտնել են հանրապետության ՆԳՆ մեդիակենտրոնից, օպերատիվ աշխատակիցներն առանձնահատուկ ուշադրություն են դարձրել երկրի հարավում գտնվող Չուի հովտին։

Հաղորդագրության մեջ նշվում է, որ «Չուի հովիտը զբաղեցնում է ավելի քան 60 հազար հեկտար ընդարձակ տարածք և գրավում է թմրանյութերի շրջանառությամբ զբաղվող հանցագործների ուշադրությունը», իսկ գործողության ընթացքում «ակտիվորեն կիրառվում են թռչող ապարատներ, ավիացիա և տիեզերական մոնիթորինգ»։ Գերատեսչության տվյալներով՝ դրա անցկացման երեք ամիսների ընթացքում խափանվել է թմրամիջոցների հետ կապված ավելի քան 2 հազար իրավախախտում, լիկվիդացվել է 4 կազմակերպված հանցավոր խումբ, և շրջանառության մեջ չի դրվել 21 տոննա թմրանյութ։

«Գրանցվել է թմրանյութ պարունակող բույսերի մշակման 256 փաստ, ոչնչացվել են տասնյակ թմրապլանտացիաներ։ Բնակելի տարածքներում լիկվիդացվել է թմրաբույսերի արհեստական աճեցման համար նախատեսված 25 ֆիտոլաբորատորիա։ Օպերատիվ-կանխարգելիչ միջոցառումը շարունակվում է», — հավելել են հանրապետության ՆԳՆ-ում։

Չուի գետի հովիտը գտնվում է Ղազախստանի և Ղրղզստանի տարածքում։ Ղազախստանում գետն անցնում է երկու՝ Ժամբիլի և Թուրքեստանի մարզերով։ Լրատվամիջոցները Չուի հովիտը հաճախ անվանում են բուսական ծագման թմրանյութերի զանգվածային արտադրության վայր։ Tengrinews պորտալը 2014 թվականին հայտնել էր, որ ոստիկանները գիտնականների հետ համատեղ դիտարկում էին հովտում վայրի կանեփի պլանտացիաները հերբիցիդներով ոչնչացնելու և հետագայում այնտեղ կերային մշակաբույսեր ցանելու հնարավորությունը։