Նախընտրելի
Ուկրաինայի նախագահ Վլադիմիր Զելենսկու ինքնաթիռը Քիշնևից Օսլո մեկնելիս ենթարկվել է ԱԹՍ-ի հարձակման, NRK-ին հայտնել է Նորվեգիայի վարչապետ Յոնաս Գար Ստյորեն։ Միջադեպը տեղի է ունեցել սեպտեմբերի 8-ին, երբ Զելենսկին ուղևորվում էր Նորվեգիայի թագավոր Հարալդ V-ի հուղարկավորությանը։ «Նրա ինքնաթիռը Մոլդովայից թռչելու պահին քիչ էր մնում բախվեր անօդաչու թռչող սարքի։ Սա այն իրականությունն է, որում նա ապրում է», — նշել է Ստյորեն։ Նորվեգիայի վարչապետի աշխատակազմի տվյալներով՝ ԱԹՍ-ի սպառնալիքի պատճառով թռիչքը ստիպված են եղել հետաձգել։
Մոլդովայի կառավարության ներկայացուցիչը «Reuters»-ին հաստատել է այս տեղեկությունը։ Նրա խոսքով՝ Զելենսկու ինքնաթիռին թռիչքի թույլտվություն է տրվել այն բանից հետո, երբ պարզվել է, որ ռուսական դրոնն ընկել է հանրապետության տարածքում։ Նախարարությունից հայտնել են, որ «Shahed» տեսակի ռուսական անօդաչուն ժամը 17:26-ին ընկել է Ստարիե Միխայլյանի գյուղի մոտ գտնվող դաշտում, ինչի հետևանքով հրդեհ է բռնկվել։ Նորվեգիայի ֆինանսների նախարար և ՆԱՏՕ-ի նախկին գլխավոր քարտուղար Յենս Ստոլտենբերգը հայտնել է, որ հանդիպման ժամանակ Զելենսկին պատմել է Մոլդովայում իր ինքնաթիռին սպառնացող վտանգի մասին, սակայն առանց մանրամասների։ Միևնույն ժամանակ նախարարը նշել է, որ ուկրաինացի նախագահին «սպանության սպառնալիք է կախված» ռուսական ներխուժման հենց սկզբից։
«Հյոյրե» կուսակցության առաջնորդ, արտաքին գործերի նախկին նախարար Ինե Էրիկսեն Սյորեյդեն ծանր է որակել այն իրավիճակը, որում ապրում է Զելենսկին։ «Նա գտնվում է մշտական սպառնալիքի տակ, բայց միևնույն ժամանակ հստակ հասկացրել է, որ չի պատրաստվում փախչել իր երկրից։ Ընդհակառակը, նա մնում է այնտեղ և հանդիպում աշխարհի առաջնորդներին՝ Ուկրաինային աջակցությունը շարունակաբար ապահովելու համար», — ընդգծել է Սյորեյդեն։
