ԿՀՎ-ն դեռևս 1998 թվականի դեկտեմբերին նախագահ Բիլ Քլինթոնին զգուշացրել էր Ուսամա բեն Լադենի և նրա համախոհների կողմից ԱՄՆ տարածքում հարձակումների նախապատրաստման մասին, ներառյալ ամերիկյան ուղևորատար ինքնաթիռի հնարավոր առևանգումը, հետևում է հետախուզական ամփոփագրից, որը գերատեսչությունը գաղտնազերծել է սեպտեմբերի 11-ի ահաբեկչությունների 25-րդ տարելիցին ընդառաջ։

«Ստացված տվյալները… ցույց են տալիս, որ բեն Լադենը և նրա դաշնակիցները նախապատրաստում են հարձակումներ ԱՄՆ-ում, ներառյալ ինքնաթիռի առևանգումը՝ շեյխ Օմար Աբդ ար-Ռահմանի, Ռամզի Յուսեֆի և Մուհամմադ Սադիկ Ավդայի ազատ արձակմանը հասնելու նպատակով»,- ասվում է փաստաթղթում։

1998 թվականի դեկտեմբերի 4-ի փաստաթուղթը, որը ներառվել էր նախագահի ամենօրյա բրիֆինգում, պարունակում էր տեղեկություններ ահաբեկիչների ծրագրերի մասին՝ բեն Լադենի անունից ԱՄՆ-ում գործողություն իրականացնելու վերաբերյալ։ Ըստ ամփոփագրի՝ աղբյուրներից մեկը հայտնել էր, որ մինչև հոկտեմբերի վերջ «Գամաաթ ալ-Իսլամիա» խմբավորումն արդեն ավարտել էր նման գործողության ծրագրումը, սակայն այն կասեցվել էր։

Բացի դրանից, ԿՀՎ-ն տեղեկություններ էր ստացել, որ «Գամաաթ ալ-Իսլամիա»-ի առաջնորդ Մոհամեդ ալ-Իսլամբուլին 1998 թվականի սեպտեմբերի վերջին ծրագրում էր առաջիկա մի քանի շաբաթների ընթացքում առևանգել ամերիկյան ավիալայներ՝ բանտարկված իսլամիստների, այդ թվում՝ շեյխ Օմար Աբդել-Ռահմանի և Ռամզի Յուսեֆի ազատ արձակմանը հասնելու համար, ասվում է փաստաթղթում։

Հատկանշական է, որ, ըստ գաղտնազերծված հետախուզական ամփոփագրի, ահաբեկիչների օպերատիվ խմբի երկու անդամ կարողացել էին ստուգման ժամանակ շրջանցել Նյու Յորքի օդանավակայաններից մեկի անվտանգության համակարգը։ Փաստաթղթում նաև նշվում էին բեն Լադենի ծրագրերը՝ մինչև 1998 թվականի դեկտեմբերի 20-ը ամերիկյան ինքնաթիռների առևանգում իրականացնելու վերաբերյալ։

2026 թվականին լրանում է ԱՄՆ պատմության մեջ ահաբեկչությունների խոշորագույն շարքի՝ 2001 թվականի սեպտեմբերի 11-ին տեղի ունեցած հարձակումների 25-ամյակը։ Այն ժամանակ «Ալ-Քաիդա»-ի զինյալները առևանգեցին չորս ուղևորատար ինքնաթիռ և դրանք ուղղեցին Նյու Յորքի Համաշխարհային առևտրի կենտրոնի աշտարակների և Պենտագոնի շենքի վրա։ Չորրորդ ինքնաթիռը կործանվեց Փենսիլվանիա նահանգի Շենքսվիլի մերձակայքում։ Հարձակումների հետևանքով զոհվեց 2977 մարդ՝ 2753-ը Նյու Յորքում, 184-ը՝ Պենտագոնի մոտ և 40-ը՝ 93-րդ չվերթի օդանավում։