Հնագետները Պերուի հյուսիսում գտնվող Չան-Չան հնագիտական համալիրում հայտնաբերել են հին Չիմու մշակույթի ազնվական ներկայացուցիչների 38 թաղում։ Ինչպես գրում է GreekReporter-ը՝ հղում անելով Պերուի մշակույթի նախարարությանը, գրեթե անձեռնմխելի թաղումները գտնվել են ավելի քան 600 տարի թաքնված մնացած թաղման հարթակում՝ Ուտժ-Ան համալիրի ներսում, որը Մեծ Չիմուի նախկին պալատն է։

Թաղման հարթակը բաղկացած է կենտրոնական և երկու կողային խցերից։ Կենտրոնական հատվածում հնագետները գտել են մեկ մարդու աճյուն, որի կողքին կային մետաղից և խեցիներից պատրաստված բազմաթիվ իրեր։ Երկու կողային խցերից յուրաքանչյուրի երկարությունը մոտ 8 մ է։ Դրանցից մեկում մարդկային աճյուններ չեն հայտնաբերվել, սակայն ներսում եղել են զենքեր և մետաղական խորհրդանշաններ։ Մյուսում հնագետները գտել են 20 թաղված մարդու։ Եվս 18 մարդու հայտնաբերել են հարթակի այլ հատվածներում․ ընդհանուր առմամբ հետազոտողները հաշվել են 38 թաղում։

Գիտնականների առանձնահատուկ ուշադրությունը գրավել է թաղումներից մեկը։ Ի տարբերություն Չիմուների շրջանում տարածված ավանդույթի՝ մահացածներին թաղել նստած դիրքով ու ծալված ոտքերով, այս խցում մարմինը ամբողջովին ձգված էր։ Հնագետները դեռևս չեն պարզել նման անսովոր դիրքի պատճառը։ Հնարավոր բացատրությունների թվում նրանք դիտարկում են ծիսական զոհաբերությունը կամ մահացածի բացառիկ բարձր կարգավիճակը՝ կողքին թաղված մյուս մարդկանց համեմատ։

Թաղվածների կարգավիճակը հաստատում են նաև հայտնաբերված առարկաները։ Աճյունների վրա և դրանց կողքին հայտնաբերվել են ականջօղեր, ծովային խեցիներից և քվարցից վզնոցներ, մետաղական գլխազարդեր, ինչպես նաև մետաղական տարրերով փայտե արկղիկներ։ Թաղվածներից որոշների գլխի վրա պահպանվել է կարմիր պիգմենտ։ Պերուի մշակույթի նախարարության տվյալներով՝ նման ներկումն օգտագործվել է բարձր սոցիալական դիրք ունեցող մարդկանց թաղումներում անդյան հասարակություններում։

Աշխատանքներն իրականացվում են Ուտժ-Անում՝ Չան-Չանի ամենախոշոր պարսպապատ համալիրներից մեկում, որը Պերուում հայտնի է նաև որպես Մեծ Չիմու։ Հնագետները հույս ունեն նոր գտածոների օգնությամբ ճշտել համալիրի պատմությունը և պարզել, թե ինչպես է այն օգտագործվել Մոչե հովտի ինկերի կողմից նվաճումից հետո ընկած ժամանակաշրջանում։

Չիմու ազնվականների բազմաթիվ դամբարաններ թալանվել կամ ավերվել են իսպանական նվաճումից հետո։ Արդյունքում դրանցից առարկաները հայտնվել են թանգարանային հավաքածուներում՝ ցրված ձևով, իսկ թաղումների սկզբնական համատեքստը կորել է։ Հայտնաբերված թաղման հարթակը հնարավորություն է տալիս ուսումնասիրել թաղումները և դրանց ուղեկցած առարկաները անմիջապես այն տեսքով, որով դրանք թողնվել էին մոտ վեց դար առաջ։