Բահրեյնը չի մասնակցի Իրանի հետ Հորմուզի նեղուցով նավագնացության հարցի շուրջ հանդիպումներին՝ մինչև երկու երկրների միջև դիվանագիտական հարաբերությունների վերականգնումը, հաղորդել է Reuters-ը։

Մանամայում ընդգծել են, որ Հորմուզի նեղուցի շուրջ իրավիճակի վերաբերյալ ցանկացած բանակցություններին մասնակցությունը հնարավոր է միայն Թեհրանի հետ դիվանագիտական կապերի վերականգնումից հետո։

Բահրեյնը խզել է դիվանագիտական հարաբերություններն Իրանի հետ 2016 թվականին՝ Սաուդյան Արաբիայի հետևից։ Որոշումն ընդունվել է Իրանում Սաուդյան Արաբիայի դիվանագիտական ներկայացուցչությունների վրա ցուցարարների հարձակումներից հետո։ Ցուցարարները հանդես էին գալիս Սաուդյան Արաբիայում շիա քարոզիչ Նիմր ան-Նիմրի մահապատժի դեմ։

Հորմուզի նեղուցը նավթի համաշխարհային առևտրի կարևորագույն երթուղիներից մեկն է։ Դրա միջոցով իրականացվում է Մերձավոր Արևելքից նավթի և նավթամթերքների ծովային մատակարարումների զգալի մասը։