նախընտրելի դարձնելՀայաստանի երկրորդ նախագահ Ռոբերտ Քոչարյանն այժմ պահվում է մենախցում և մյուս կալանավորների հետ շփվելու հնարավորություն չունի։ Սեպտեմբերի 14-ին լրագրողների հետ զրույցում այս մասին հայտնել է փաստաբան Տաթևիկ Սողոյանը՝ արձագանքելով այն հարցին, թե արդյոք նախկին նախագահը տեսակցում է իր կալանավորված որդուն՝ Սեդրակ Քոչարյանին։
«Քրեակատարողական հիմնարկներում կալանավորված անձինք, բացի իրենց խցակիցներից, առհասարակ չեն կարող տեսակցել միմյանց։ Ռոբերտ Քոչարյանն այժմ մենախցում է և որևէ այլ կալանավորի տեսնելու որևէ հնարավորություն չունի», — պարզաբանել է փաստաբանը։
Նրա խոսքով՝ դատարանի որոշմամբ Սեդրակ Քոչարյանին տեսակցություններ թույլատրված են բացառապես կնոջ և երեխաների հետ, իսկ Ռոբերտ Քոչարյանի պարագայում որոշման մեջ նշված են «մերձավոր ազգականները»։
Լրագրողները հետաքրքրվել են, թե ինչու Քոչարյանի կրտսեր որդին՝ Լևոնը, լինելով պատգամավոր և ըստ մանդատի իրավունք ունենալով անարգել այցելել քրեակատարողական հիմնարկներ ու հետևել պահման պայմաններին, այդ թվում՝ կալանավորների առողջական վիճակին, այդուհանդերձ չի կարողանում տեսակցել հորն ու եղբորը։
Փաստաբանը նշել է, որ ՔԿՀ-ն մերժում է այցելությունները, քանի որ դատարանի որոշման մեջ պատգամավորների համար առանձին բացառություն նախատեսված չէ։ «Ասում են՝ պատգամավորների համար հատուկ վերապահում չկա, նշված են միայն մերձավոր ազգականները։ Այդ պատճառով տեսակցությունները կազմակերպվում են ընդհանուր հիմունքներով. մերձավոր ազգականները կարող են տեսակցել ամսվա մեջ ընդամենը երկու անգամ», — պարզաբանել է Սողոյանը։
