նախընտրելի դարձնելԻտալական հարավային Բրինդիզի քաղաքի հիվանդանոցի բժիշկները հերքել են լրատվամիջոցների տարածած լուրը լիցեյի մոտի պայթյունի երկրորդ տուժածի մահվան մասին:
Sky TG24 հեռուստաալիքը, վկայակոչելով բժիշկներին, հաղորդել է, որ երկրորդ աղջիկը չափազանց ծանր վիճակում է, բայց ողջ է:
Միաժամանակ Հռոմի իշխանությունները հրաժարվել են մայիսի 19-ի երեկոյան «Թանգարանային գիշեր» միջոցառման անցկացումից: Ինչպես հաղորդել է Հռոմի քաղաքապետ Ջաննի Ալեմանոն, այն չի կայանա սգի եւ վշտի պատճառով, գրում է «ՌԻԱ Նովոստին»:
Ինչպես հաղորդել էր NEWS.am-ը, Իտալիայի հարավում գտնվող Բրինդիզի քաղաքում մայիսի 19-ին պայթյուն է որոտացել: Պայթյունը որոտացել է տեղական ժամանակով ժամը 8-ի սահմաններում (10 Երեւանի ժամանակով) , երբ ուսանողները գնալիս են եղել դասի: Զոհվել է 16-ամյա ուսանողուհի, ութ մարդ վիրավորվել է:
Լիցեյն անվանակոչված է դատավոր Ֆրանչեսկա Մորվիլո Ֆալկոնեի` սիցիլիական մաֆիայի դեմ հայտնի մարտնչող Ջովանի Ֆալկոնեի կնոջ պատվին: Նրանք միասին երեք թիկնապահներով հանդերձ զոհվել էին Պալերմո քաղաքում 1992թ. մայիսի 23-ին կազմակերպված ահաբեկչության հետեւանքով:
Ինչպես հայտնում են իտալական լրատվամիջոցները, քննիչների վարկածներից մեկի համաձայն պայթյունի թիկունքում կարող է մաֆիան լինել:
