Նախընտրելի
Վրաստանի վարչապետ Իրակլի Կոբախիձեն հայտարարել է, որ Հայաստանը դեռ չի հաղթահարել Հայոց ցեղասպանության ցավը, քանի որ միջազգային մակարդակում շարունակվում է դրա ճանաչման համար պայքարը։ Այդ մասին նա ասել է քաղաքական քննարկման ընթացքում՝ պատասխանելով իր ընդդիմախոս Պաատա Զաքարեիշվիլիին, հաղորդում է Georgia Online‑ը։
«Դուք խոսում եք հայ ժողովրդի անունի՞ց։ Ինչո՞ւ որոշեցիք, որ Հայաստանն արդեն հաղթահարել է այդ ցավը, երբ միջազգային մակարդակում մինչ օրս շարունակվում է ցեղասպանության ճանաչման արշավը»,- հայտարարել է Կոբախիձեն։
Քննարկման ընթացքում իշխող «Վրացական երազանք» կուսակցության ներկայացուցիչներն անդրադարձել են նաև Վրաստանի և Ռուսաստանի հարաբերություններին ու կոռուպցիայի հարցերին։
Պատգամավոր Նիկոլոզ Սամխարաձեն, դիմելով քաղաքագետ Նիկա Չիտաձեին, հայտարարել է, որ հենց գործող վրացական իշխանությունն է դիմել Մարդու իրավունքների եվրոպական դատարան և հասել նրան, որ ճանաչվել է՝ Ռուսաստանը 1993 թվականից իրականացրել է Աբխազիայի և Հարավային Օսիայի դե ֆակտո օկուպացիան։
Կոբախիձեն, իր հերթին, հայտարարել է, որ 2022 թվականին Վրաստանում ռուսական ռազմական միջամտության բացակայությունը դարձել է 2012 թվականից հետո իշխանությունների վարած քաղաքականության արդյունքը։ Միաժամանակ վարչապետը հետաքրքրվել է, թե ընդդիմախոսների կարծիքով Ռուսաստանը կոնկրետ ինչ շահ է ստացել այդ քաղաքականությունից։
Պատասխանելով կոռուպցիայի մեղադրանքներին՝ Կոբախիձեն հայտարարել է, որ պատրաստ է անհապաղ արձագանքել կոռուպցիայի ցանկացած կոնկրետ փաստի, եթե դրանում ներգրավված լինի նախարար։
Վարչապետը միաժամանակ մեկնաբանել է պատրիարքի հուղարկավորության համար հատկացված միջոցների ոչ բարեխիղճ ծախսման վերաբերյալ մեղադրանքները։ Նա նշել է, որ այդ նպատակների համար նախատեսված երեք միլիոն լարիից ծախսվել է 722 հազար լարի։
«Եթե ինչ‑որ մեկը ուզենար գողանալ գումարը, կյուրացներ ամբողջ 3 միլիոնը», — հայտարարել է Կոբախիձեն։
