Նախընտրելի
ԱՄՆ նախագահ Դոնալդ Թրամփի վարչակազմը ծրագրում է Իսրայելին վաճառել 2,8 մլրդ դոլար արժողությամբ զինամթերքի փաթեթ, որի մեջ կներառվեն 40 հազար ավիառումբ, որոնցից յուրաքանչյուրի քաշը 2 հազար ֆունտ է (մոտ 907 կգ), հայտնում է Reuters-ը՝ հղում անելով ամերիկացի պաշտոնյայի, որը ծանոթ է նախատեսվող գործարքին։
Աղբյուրի խոսքով՝ խոսքը 20 հազար MK-84 և 20 հազար BLU-117 ռումբերի մասին է։ Բացի այդ, փաթեթը ներառում է 20 հազար I-2000 թափանցող մարտական մաս։ Գործարքի ընդհանուր արժեքը կազմում է 2,8 մլրդ դոլար։
Պլանավորվող վաճառքի մասին ԱՄՆ վարչակազմն արդեն ոչ պաշտոնապես տեղեկացրել է Կոնգրեսի համապատասխան հանձնաժողովներին, որոնք մասնակցում են սպառազինության վաճառքի խոշոր գործարքների քննարկմանը։ Գործարքի վերաբերյալ պաշտոնական ծանուցումը դեռևս չի հրապարակվել։ ԱՄՆ Պետդեպարտամենտը և Իսրայելի դեսպանատունը չեն պատասխանել մեկնաբանության վերաբերյալ Reuters-ի հարցումներին։
The Washington Post-ը, որն առաջինն էր հայտնել փաթեթի նախապատրաստման մասին, նշում է, որ խոսքը վերջին տարիների ընթացքում Իսրայելին այս տեսակի զինամթերքի ամենախոշոր վաճառքի մասին է։ 2 հազար ֆունտանոց զինամթերքի մատակարարման նախորդ խոշոր գործարքը հաստատվել էր Թրամփի վարչակազմի կողմից 2025 թվականին և գնահատվում էր 2,04 մլրդ դոլար։
MK-84 ռումբերը պատկանում են արևմտյան երկրների սպառազինության մեջ գտնվող ամենահզոր սովորական զինամթերքին։ Դրանք իսրայելական զինվորականները կիրառել են Գազայի հատվածում և Լիբանանում իրականացված գործողությունների ընթացքում։ Այսպիսի զինամթերքի օգտագործումը խիտ բնակեցված շրջաններում դարձել է իրավապաշտպանների և միջազգային մարդասիրական իրավունքի մասնագետների քննադատության առարկա։
Պլանավորվող վաճառքը տեղի է ունենում ԱՄՆ-ում Իսրայելին տրամադրվող ռազմական աջակցության ծավալների վերաբերյալ քննարկումների ֆոնին։ Quinnipiac University-ի հունիսյան հարցման տվյալներով՝ ամերիկացի ընտրողների 48%-ը և դեմոկրատների 66%-ը կարծում էին, որ ԱՄՆ-ը Իսրայելին չափազանց մեծ աջակցություն է ցուցաբերում։ 2017 թվականին այդպես էին պատասխանում հարցվածների համապատասխանաբար 16%-ը և 20%-ը։
Միևնույն ժամանակ Թրամփի վարչակազմի առաջարկը ներկայացվել է Մերձավոր Արևելքում շարունակվող ռազմական գործողությունների ֆոնին։ ԱՄՆ-ն և Իսրայելը փետրվարի 28-ին սկսել են համատեղ հարվածներ հասցնել Իրանին, որից հետո Իրանը պատասխան հարվածներ է հասցրել Իսրայելին և Պարսից ծոցի երկրներին, որտեղ տեղակայված են ամերիկյան ռազմական բազաներ։
