ԱՄՆ Տեխաս նահանգում չորեքշաբթի օրը նախատեսված է երեք մարդու սպանության համար դատապարտված 40-ամյա ԼիՋեյմս Նորմանի մահապատիժը։ Ինչպես հայտնում է Associated Press գործակալությունը, նույն օրը Ջորջիայում դատավորը կասեցրել է 53-ամյա Սթեյսի Համֆրիսի մահապատիժը, որը նույնպես պետք է ի կատար ածվեր չորեքշաբթի։

Նորմանը մահապատժի էր դատապարտվել 2005 թվականին 24-ամյա Սեմյուել Ռոբերտսի, 18-ամյա Թիֆանի Փիքոքի և 38-ամյա Սելսո Լոպեսի սպանության համար։ Դատական գործի նյութերի համաձայն՝ Նորմանն ու նրա հանցակից Քեր'Շոն Ռեյմին ներխուժել էին Էդնա քաղաքի տներից մեկը՝ կոկային գտնելու և բնակիչներին թալանելու նպատակով։ Թմրանյութ չգտնելով՝ նրանք հրազենով սպանել էին երեք բնակիչներին։

Նորմանին ձերբակալել էին սպանություններից մոտ հինգ ամիս անց, երբ նա փորձում էր Մեքսիկայից մուտք գործել ԱՄՆ։ Նա իրեն մեղավոր է ճանաչել ծանրացուցիչ հանգամանքներում կատարված սպանության մեջ, ինչից հետո երդվյալ ատենակալները նրա նկատմամբ մահապատիժ են սահմանել։ Ռեյմին նույնպես դատապարտվել է մահապատժի․ նրա դատավճռի ի կատար ածումը նախատեսված է հաջորդ շաբաթ։

Երկուշաբթի օրը Թեքսասի Ներման և պայմանական վաղաժամկետ ազատման խորհուրդը մերժել է Նորմանի մահապատիժն ավելի մեղմ պատժատեսակով փոխարինելու կամ 90 օրով հետաձգելու դիմումը։ Թեքսասի վերաքննիչ դատարանը ևս մերժել է փաստաբանների՝ մահապատժի կասեցման վերաբերյալ միջնորդությունը, ինչից հետո պաշտպանական կողմը դիմել է ԱՄՆ Գերագույն դատարանին։

Ջորջիայում Համֆրիսի մահապատիժը նախատեսված էր տեղական ժամանակով երեկոյան ժամը 7-ին։ Նա դատապարտվել էր 2003 թվականին անշարժ գույքի երկու գործակալների՝ 33-ամյա Սինդի Ուիլյամսի և 21-ամյա Լորի Բրաունի սպանության համար։ Քննության տվյալներով՝ Համֆրիսը ներխուժել էր նոր բնակելի համալիրի ցուցադրական տանը տեղակայված վաճառքի գրասենյակ, ստիպել կանանց հայտնել իրենց բանկային քարտերի PIN-կոդերը, ապա գնդակահարել նրանց։ Դրանից հետո նրանց հաշիվներից կանխիկացվել էր ավելի քան 3000 դոլար։

Երեքշաբթի օրը Ջորջիայի Ներման և պայմանական վաղաժամկետ ազատման խորհուրդը մերժել էր Համֆրիսի ներման դիմումը։ Սակայն ավելի ուշ դատավորը կասեցրել է դատավճռի կատարումը՝ համաձայնելով քննել պաշտպանական կողմի միջնորդությունը պատժի վերանայման վերաբերյալ՝ նահանգում վերջերս ընդունված «Survivor Justice Act» (Զոհերի արդարադատության մասին) օրենքին համապատասխան։ Այդ օրենքը որոշակի դեպքերում թույլ է տալիս պատժի վերանայման ժամանակ հաշվի առնել ամբաստանյալի կրած բռնությունը։

Համֆրիսի փաստաբանները պնդում են նաև, որ մահապատժի դատավճիռը կարող էր կայացված լինել կանխակալ երդվյալ ատենակալի մասնակցությամբ, իսկ ներման դիմումի քննության ընթացակարգը խախտվել է խորհրդի անդամներից մեկի շահերի բախման պատճառով։ Նախկինում դատարանները մերժել էին այս փաստարկները ընթացակարգային հիմքերով։

Այժմ Համֆրիսի մահապատժի ելքը կախված է գործի հետագա քննությունից։ Ջորջիայի իշխանությունները մտադիր են բողոքարկել դատավճռի կասեցման որոշումը և հասնել դրա չեղարկմանը մինչև նշանակված ժամը։

Associated Press-ի տվյալներով՝ 2026 թվականին ԱՄՆ-ում ցայսօր ի կատար է ածվել 25 մահապատիժ։ Տեխասը ծրագրում է այս տարի իրականացնել հինգերորդ մահապատիժը, մինչդեռ Ջորջիայում դեռևս ոչ մի դեպք չի գրանցվել։ Մահապատիժների թվով երկրում առաջատարը Ֆլորիդան է։