Ռուս ընդդիմադիր քաղաքական գործիչ Իլյա Յաշինը չեղարկել է Երևան նախատեսված այցը՝ Հայաստանում իր անվտանգությանն սպառնացող ռիսկերի մասին զգուշացում ստանալուց հետո։ Այս մասին հայտնում է «Մեդուզան»։

Ըստ նրա՝ խոսքը ֆիզիկական հնարավոր վտանգի մասին է։

Ներկայում Յաշինը գտնվում է ԱՄՆ-ում։ Նա ծրագրել էր Երևան գալ մինչև սեպտեմբերի 20-ը՝ Պետդումայի ընտրությունների քվեարկության վերջին օրը, որպեսզի այցելեր ընտրատեղամաս, մասնակցեր «մեծ հակապատերազմական հերթ» ակցիային և հանդիպեր պատերազմին դեմ արտահայտվող ռուսաստանցիների հետ։

«Մինչ Վաշինգտոնում էի, ինձ զգուշացրեցին Հայաստան կատարելիք այցիս հետ կապված որոշակի ռիսկերի մասին։ Մանրամասներ չեմ կարող բացահայտել, բայց խոսքը ֆիզիկական վտանգի մասին է», — Telegram-ի իր ալիքում գրել է Յաշինը։

Նրա խոսքով՝ ինքը չի կարող անտեսել ստացված տեղեկությունն ու ստիպված է հետևել անվտանգության կանոնակարգերին։ Այդ իսկ պատճառով Հայաստան այցը հետաձգվում է, իսկ այնտեղ նախատեսված միջոցառումները՝ չեղարկվում։

Ընդ որում, Յաշինը մտադիր է մասնակցել «Կեսօրը հանուն խաղաղ Ռուսաստանի» ակցիային։ Սեպտեմբերի 20-ին՝ ժամը 12:00-ին, նա նախատեսում է գնալ Նյու Յորքում Ռուսաստանի դեսպանատան մոտ գտնվող ընտրատեղամաս։

Յաշինն ու ռուս այլ ընդդիմադիրներն առաջարկել են «Կեսօրը հանուն խաղաղ Ռուսաստանի» ակցիան անցկացնել Պետդումայի ընտրությունների վերջին օրը։ Նրանք Վլադիմիր Պուտինի քաղաքականությանը դեմ մարդկանց կոչ են արել սեպտեմբերի 20-ին՝ ուղիղ կեսօրին, գնալ ընտրատեղամասեր։

Յաշինը չի հստակեցրել, թե կոնկրետ ով է իրեն զգուշացրել հնարավոր սպառնալիքի մասին, ինչպես նաև որևէ մանրամասն չի հայտնել այդ տեղեկության բնույթի կամ աղբյուրի վերաբերյալ։