Նախընտրելի
Ֆրանսիայի նախագահ Էմանուել Մակրոնը, ելույթ ունենալով ՄԱԿ-ի Գլխավոր ասամբլեայի 81-րդ նստաշրջանում, պետություններին կոչ է արելթույլ չտալ վերադարձ մի աշխարհ, որտեղ «ճիշտ է նա, ով ուժեղ է», և հանդես է եկել միջազգային իրավունքի պահպանման օգտին՝ առանց երկակի չափանիշների։
«Ուզո՞ւմ ենք մենք ապրել այսպիսի իրավիճակում՝ մի աշխարհում, որտեղ վերադառնում է ջունգլիների օրենքը, թե՞ ուզում ենք ապրել քաղաքակիրթ միջազգային հասարակությունում»,- հայտարարել է Մակրոնը։
Ըստ նրա՝ ՄԱԿ-ի հիմնական խնդիրը այսօր պետությունների ինքնիշխանությունը պաշտպանելն է և ավելի ուժեղ երկրներին թույլ չտալը որոշել մյուսների ճակատագիրը։ Ֆրանսիայի առաջնորդը կոչ է արել վերակենդանացնել բազմակողմայնությունը և ցույց տալ, որ միջազգային հանրությունը կարող է միասին պատասխանել գլոբալ մարտահրավերներին։
«Մենք չպետք է տրվենք ֆատալիզմին և պարտվողականությանը»,- ասել է Մակրոնը՝ հավելելով, որ Ֆրանսիան մտադիր է շարունակել հանդես գալ միջազգային իրավունքի պաշտպանության և դրա խախտումների համար անպատժելիության դեմ։
Առանձին ֆրանսիացի նախագահը կոչ է արել հրաժարվել միջազգային քաղաքականության մեջ երկակի չափանիշներից։ «Մենք պետք է ամենուր պաշտպանենք նույն սկզբունքները»,- հայտարարել է նա՝ ընդգծելով, որ բոլոր ժողովուրդների ինքնիշխանությունը պետք է ունենա նույն արժեքը։
Խոսելով Ուկրաինայի մասին՝ Մակրոնը հայտարարել է, որ Ռուսաստանը գրեթե հինգ տարի պատերազմ է վարում քաղաքացիական բնակչության դեմ և օկուպացնում է ինքնիշխան պետության տարածքները։ Նա հավաստիացրել է, որ Ֆրանսիան կշարունակի աջակցել ուկրաինացիների խաղաղության, անվտանգության և ապագայի ձգտմանը՝ միաժամանակ ձգտելով Մոսկվայի և Կիևի միջև բովանդակային բանակցությունների մեկնարկին։
Մակրոնը կոչ է արել ուժեղացնել ուկրաինական բնակչության պաշտպանությունը ձմռան նախօրեին և առաջարկել է սահմանել երկու մորատորիում՝ էներգետիկ և քաղաքացիական ենթակառուցվածքների վրա հարվածների, ինչպես նաև Սև ծովում ռազմական գործողությունների վերաբերյալ, որոնք հնարավորություն կտան վերսկսել հացահատիկի փոխադրումները։
«Այս կրկնակի մորատորիումը անհրաժեշտ է։ Եկեք այն դնենք բանակցությունների սեղանին»,- հայտարարել է Ֆրանսիայի նախագահը։
Մակրոնն անդրադարձել է նաև Մերձավոր Արևելքում իրավիճակին՝ հայտարարելով Լիբանանի ինքնիշխանությունը և պաղեստինցիների իրավունքները հարգելու անհրաժեշտության մասին։ Նրա գնահատմամբ՝ Իսրայելի անվտանգությունը երկարաժամկետ հեռանկարում անհնար է առանց պաղեստինյան հարցի լուծման։
«Ի՞նչ արժե մեր հեղինակությունը, եթե Գազայի հարցում անգործություն ենք ցուցաբերում»,- հարցրել է Ֆրանսիայի առաջնորդը։
Նա նշել է, որ Պաղեստինի ճանաչումն ինքնին չի լուծում խնդիրը, եթե միջազգային հանրությունը հետագա քայլեր չի ձեռնարկում։ Մակրոնը հայտարարել է նաև Գազայի բնակչությանը մարդասիրական օգնություն ապահովելու և մարտական գործողությունները դադարեցնելու անհրաժեշտության մասին։
Ֆրանսիայի նախագահը կոչ է արել պահպանել միջազգային մարդասիրական իրավունքը և աջակցել միջազգային դատական մեխանիզմների աշխատանքին։ Նա միաժամանակ հանդես է եկել ՄԱԿ-ի Անվտանգության խորհրդի բարեփոխման օգտին, մասնավորապես՝ դրա կազմի ընդլայնման՝ Աֆրիկայի շահերը հաշվի առնելով։
Ըստ Մակրոնի՝ աշխարհը չպետք է վերադառնա մի համակարգի, որտեղ ուժը փոխարինում է իրավունքին։ «Կյանքը կյանք է»,- հայտարարել է նա՝ խոսելով մարդկանց իրավունքները հավասարապես պաշտպանելու անհրաժեշտության մասին՝ անկախ նրանից, թե որտեղ են նրանք ապրում։
