Ֆորտ Նոքսը Կենտուկի նահանգում տեղակայված ամրացված համալիր է և ԱՄՆ-ի ոսկու պաշարների մոտ կեսի պահման վայրը, սակայն ընդհանուր առմամբ Միացյալ Նահանգները որպես ոսկի պահելու հուսալի վայր ընկալումն աստիճանաբար փոխվում է։

Այսպես, վերջին երկու տարվա ընթացքում Նիդեռլանդներն ու Ֆրանսիան իրենց ոսկին դուրս են բերել ամերիկյան պահոցներից՝ այդ քայլը բացատրելով «աշխարհաքաղաքական անկայունությամբ»։ Մի շարք քաղաքական գործիչներ Գերմանիայում և Իտալիայում՝ այն երկրներում, որոնք աշխարհում ունեն երկրորդ և երրորդ ամենամեծ ոսկու պաշարները, նույնպես կոչ են արել ԱՄՆ-ից դուրս բերել ոսկին՝ Դոնալդ Թրամփի վարչակազմի անկանխատեսելի քաղաքականության պատճառով։

Թեև եվրոպական ոսկու ուղղակի բռնագրավումը ԱՄՆ իշխանությունների կողմից «ծայրահեղ անհավանական» է, արտակարգ իրավիճակի դեպքում այդ ակտիվների հասանելիության վերաբերյալ մտահոգությունը միանգամայն հիմնավոր է, DW-ի հետ զրույցում նշում է բրիտանական Oxford Economics վերլուծական ընկերության փորձագետ Սեբաստիեն Թիյեն։

Այնուամենայնիվ, ԱՄՆ-ը և հատկապես Մանհեթենում գտնվող Նյու Յորքի Դաշնային պահուստային բանկը շարունակում են մնալ եվրոպական, մասնավորապես գերմանական, ոսկու պահպանման հիմնական վայրերից մեկը։