Թուրքիայի նախագահ Ռեջեփ Թայիփ Էրդողանը, ըստ ամենայնի նկատի ունենալով Նյու Յորքում ՄԱԿ Գլխավոր ասամբլեայում Իսրայելի վարչապետ Բենիամին Նեթանյահուի ելույթը, հայտարարել է, որ «ռազմական հանցագործները» տեղ չունեն կազմակերպության ամբիոնում, և նրանք պետք է դատարանում պատասխան տան իրենց գործողությունների համար։

«Ռազմական հանցագործները չպետք է լինեն ՄԱԿ ամբիոնում, նրանց տեղը դատարանների դահլիճներում է, որտեղ նրանք պատասխան կտան իրենց թափած արյան համար», — ասել է Էրդողանը Ստամբուլում 29-րդ Միջազգային բիզնես համաժողովի փակման արարողության ժամանակ։ Նրա խոսքերը մեջբերել է Anadolu գործակալությունը։

Թուրքիայի նախագահի խոսքով, եթե «ցեղասպանություն իրականացնող» մարդիկ պատասխանատվության չենթարկվեն արդարադատության և պատմության առջև, նման հանցագործությունները կարող են կրկնվել։

Էրդողանը նաև հայտարարել է, որ պաղեստինյան ժողովուրդը միայնակ չէ և առանց աջակցության չի մնացել։

«Գազայում մեր եղբայրներն ու քույրերը միայնակ չեն արդարության համար իրենց պայքարում», — ասել է Թուրքիայի նախագահը։

Նրա խոսքով՝ տարածաշրջանն ապրում է «ճգնաժամերի լիածավալ փոթորիկ», իսկ Թուրքիան գտնվում է տեղի ունեցող իրադարձությունների կենտրոնում։

Ավելի վաղ Իսրայելի վարչապետ Բենիամին Նեթանյահուն ՄԱԿ Գլխավոր ասամբլեայում իր ելույթի ընթացքում հայտարարել էր, որ Թուրքիայի նախագահը սպանել է հազարավոր քուրդ բնակիչների և ժխտում է Հայոց ցեղասպանությունը։

Նեթանյահուն նաև մեղադրել էր Էրդողանին հակասեմական ստեր տարածելու մեջ։