Թուրքիայում իշխանությունները սառեցրել են 42 մարդու և 46 իրավաբանական անձանց ակտիվները՝ կապիտալի շուկայում խախտումների հետաքննության շրջանակում։ Այս մասին հայտնել է երկրի արդարադատության նախարար Աքըն Գյուրլեքը։

Ըստ նրա, խոսքը վերաբերում է Ստամբուլի դատախազության վարած հետաքննությանը։ Քննիչները ստուգում են խարդախության, կապիտալի շուկաների մասին օրենսդրության խախտման և հանցավոր կազմակերպություն ստեղծելու կասկածները։

Նախօրեին Գյուրլեքը հայտնել էր առնվազն 45 մարդու ձերբակալության մասին, որոնց թվում եղել են ներդրումային ընկերությունների ղեկավարներ։

Հետաքննությունն իրականացվում է ճգնաժամի ֆոնին, որը սեպտեմբերի կեսերից ազդել է թուրքական ներդրումային ֆոնդերի շուկայի վրա։ Anadolu պետական գործակալության տվյալներով, Թուրքիայի Կապիտալի շուկաների խորհուրդը (SPK) լուծարել է 131 ներդրումային ֆոնդ՝ միլիարդավոր դոլարների ակտիվներով։ Գործակալության տվյալներով, ճգնաժամի ազդեցության տակ են հայտնվել ավելի քան 455 հազար ներդրողներ։

Իրավապահ մարմինները պարզում են, թե արդյոք ֆոնդերի ակտիվների արժեքը արհեստականորեն չի ուռճացվել։

Թուրքական լրատվամիջոցները հայտնում են, որ տուժածների թվում մեծ թվով մանր ներդրողներ են եղել։

Թուրքիայում բարձր գնաճի պայմաններում շատ քաղաքացիներ իրենց խնայողությունները ներդնում են բաժնետոմսերում և այլ ֆինանսական գործիքներում՝ հույս ունենալով այդպես պաշտպանել դրանք արժեզրկումից։

Ճգնաժամը անդրադարձել է նաև իշխող Արդարություն և զարգացում կուսակցության (AKP) ղեկավարությանը։ Կուսակցության փոխնախագահը և ընտանիքի հարցերով նախկին նախարար Ֆաթմա Բեթյուլ Սայան Քայան հայտարարել է կուսակցական պաշտոնից հեռանալու մասին՝ ընդդիմության մեղադրանքներից հետո։ Ընդդիմադիր կուսակցությունն ավելի վաղ հայտարարել էր, որ Քայան ճգնաժամի մեկնարկից անմիջապես առաջ բաժնետոմսերի գործարքներից զգալի շահույթ է ստացել։

Քայան չի մեկնաբանել մանրամասն այս մեղադրանքները, սակայն հայտարարել է, որ ցանկանում է հետաքննության ընթացքում իր վրա վերցնել քաղաքական պատասխանատվությունը։

Ամենախոշոր ընդդիմադիր կուսակցությունը կատարվողն անվանել է լուրջ ճգնաժամ և կառավարությանը կոչ արել փոխհատուցել ներդրողների կորուստները, հայտնում է Anadolu-ն։

Թուրքիայի նախագահ Ռեջեփ Թայիփ Էրդողանն իր հերթին հայտարարել է, որ խնդիրը ազդել է կապիտալի շուկայի միայն սահմանափակ հատվածի վրա և սպառնալիք չի ներկայացնում երկրի ֆինանսական համակարգի կամ տնտեսության համար։