Նախընտրելի
Լուիզիանայից հանրապետական սենատոր Ջոն Քենեդին Իրանի՝ Հորմուզի նեղուցը բացելու և ԱՄՆ-ի հետ բանակցությունները վերսկսելու առաջարկը անվանել է «անլուրջ»։ Ըստ նրա, Վաշինգտոնը պետք է շարունակի պատժամիջոցային ճնշումն ու շրջափակումը։
«Նախագահը Բեմբիի կրտսեր եղբայրը չէ։ Նա մերժեց այդ առաջարկը», — հայտարարել է Քենեդին CBS News-ի եթերում։
Սենատորը կոչ է արել ԱՄՆ-ին շարունակել Իրանի նկատմամբ ներկայիս քաղաքականությունը, ներառյալ պատժամիջոցներն ու, իր բնորոշմամբ, շրջափակումը։ Միաժամանակ նա ընդունել է, որ Հորմուզի նեղուցի շուրջ իրավիճակն արդեն ազդում է նավթի համաշխարհային գների վրա։
«Նեղուցն առնվազն մասամբ փակ է, և դա ազդել է նավթի գնի վրա։ Իսկ նավթը կա ամեն ինչում, այդ թվում՝ բենզինում, և դա անչափ ցավոտ է», — ասել է Քենեդին։
Նրա կարծիքով, Վաշինգտոնը պետք է միջոց գտնի կամ պայմանավորվելու իրավիճակի կարգավորման շուրջ և հասնելու նեղուցի բացմանը, կամ գնալու հետագա էսկալացիայի։ Միևնույն ժամանակ սենատորը շեշտել է, որ չէր աջակցի ամերիկյան զորքերի ուղարկմանը։
Քենեդին նաև Իրանի վերաբերյալ չափազանց կոշտ գնահատական է տվել՝ հայտարարելով, որ երկրի թուլացման արդյունքում աշխարհն ավելի անվտանգ կդառնար։
