Ուրբաթ օրվա սակարկությունների արդյունքներով ամերիկյան ֆոնդային ինդեքսները վստահ աճ են գրանցել։

Համաշխարհային շուկաներում ռիսկի դիմելու հակվածությունը մեծացել է՝ շաբաթվա վերջին նավթի գների նվազման շնորհիվ։ Միևնույն ժամանակ, արհեստական բանականության (ԱԲ) հեռանկարների հարցում ներդրողների լավատեսությունը նպաստել է տեխնոլոգիական ընկերությունների բաժնետոմսերի աճին։

Թրեյդերները վերլուծել են նաև ԱՄՆ նախագահ Դոնալդ Թրամփի և ՉԺՀ նախագահ Սի Ծինփինի բանակցությունների արդյունքների վերաբերյալ տեղեկատվությունը։ Ուրբաթ օրը հրապարակված վիճակագրական տվյալները վկայում են, որ սեպտեմբերին ԱՄՆ-ում սպառողական վստահության անկումն ավելի փոքր է եղել, քան սպասվում էր։ Միչիգանի համալսարանի կողմից հաշվարկվող սպառողական վստահության ինդեքսի վերջնական ցուցանիշն այս ամիս կազմել է 48,1 կետ (նախնականը՝ 47,8 կետ)՝ օգոստոսի 51,7 կետի դիմաց։ Trading Economics-ի հարցումներին մասնակցած վերլուծաբանները միջին հաշվով կանխատեսել էին, որ ինդեքսի սեպտեմբերյան ցուցանիշը կկազմի 47,6 կետ։

Dow Jones-ի կազմում ընդգրկված ընկերությունների շրջանում աճի առաջատարը դարձել են Microsoft Corp.-ի բաժնետոմսերը (+3,7%), որը պաշտոնապես ներկայացրել է Copilot ԱԲ-օգնականի նոր տարբերակը։

Նկատելիորեն թանկացել են նաև Sherwin-Williams Co. (+2,7%), Amgen Inc. (+2,1%), Caterpillar Inc. (+2%) և Apple Inc. (+1,5%) ընկերությունների արժեթղթերը։

Akamai Technologies Inc.-ի կապիտալիզացիան աճել է 3,2%-ով։ Կիբեռանվտանգության և ամպային հաշվարկների ոլորտում գործող ընկերությունը համաձայնագիր է կնքել Anthropic-ի հետ, որի շրջանակում վերջինիս կմատուցի 11,6 մլրդ դոլարի ծառայություններ։ Յոթնամյա պայմանագիրը նախատեսում է ձեռք բերվող ծառայությունների ծավալի մեծացման հնարավորություն՝ ընդհուպ մինչև 20 մլրդ դոլար:

Costco Wholesale Corp.-ի բաժնետոմսերը թանկացել են 2,9%-ով։ ԱՄՆ ակումբային պահեստ-խանութների խոշորագույն ցանցի օպերատորը 2026 ֆինանսական տարվա չորրորդ եռամսյակում զուտ շահույթն ավելացրել է գրեթե 15%-ով, իսկ հասույթն աճել է ավելի քան 11%-ով. ընդ որում, երկու ցուցանիշներն էլ գերազանցել են շուկայի սպասումները։

Dow Jones-ի կազմում արժեզրկման առաջատարներից են եղել Salesforce Inc.-ի (-1,8%) և International Business Machines Corp.-ի (-0,7%) արժեթղթերը։

Nike Inc.-ի բաժնետոմսերի արժեքը նվազել է 0,7%-ով։ Bank of America-ի վերլուծաբանները սպորտային հագուստ արտադրող ընկերության արժեթղթերի գնահատականը «չեզոքից» իջեցրել են «շուկայականից ցածր» մակարդակի և ընկերության վաճառքների նվազում են կանխատեսում երկրորդ ֆինանսական եռամսյակից (սեպտեմբեր-նոյեմբեր) մինչև ֆինանսական տարվա ավարտը։

Ուրբաթ օրը շուկայի փակման տվյալներով՝ Dow Jones Industrial Average ինդեքսն աճել է 0,93%-ով՝ հասնելով 51828,62 կետի։

Standard & Poor's 500 ինդեքսի ցուցանիշը բարձրացել է 0,51%-ով՝ հասնելով մինչև 7743,41 կետի:

Nasdaq Composite ինդեքսն աճել է 0,48%-ով՝ կազմելով 27068,72 կետ։