Նավթի գների և ԱՄՆ պետական պարտատոմսերի եկամտաբերության աճի պատճառով Ուոլ Սթրիթը փակվել է անկմամբ

Ամերիկյան ֆոնդային ինդեքսները երկուշաբթի օրվա առևտրաշրջանի արդյունքներով նվազել են․ բաժնետոմսերի շուկայի վրա ճնշում են գործադրել նավթի գների և պետական պարտատոմսերի եկամտաբերության աճը։

Նավթի գները երկուշաբթի կտրուկ աճել էին ԱՄՆ նախագահ Դոնալդ Թրամփի այն հայտարարություններից հետո, թե ինքը մերժել է Թեհրանի առաջարկած լարվածության թուլացման պլանը։ Երեկոյան նավթի գնանշումները կորցրին աճի մի մասը այն լուրերի ֆոնին, որ ամերիկա-իրանական հակամարտության կարգավորման միջնորդները մտադիր են ակտիվացնել ջանքերը՝ հաջորդ շաբաթ Վաշինգտոնի և Թեհրանի միջև բանակցությունների նոր փուլ կազմակերպելու ուղղությամբ։

Էներգակիրների թանկացումն ուժեղացրել է գնաճի արագացման մտավախությունները և Դաշնային պահուստային համակարգի (ԴՊՀ) կողմից հիմնական տոկոսադրույքի բարձրացման սպասումները, ինչը նպաստել է ԱՄՆ 10-ամյա գանձապետական պարտատոմսերի եկամտաբերության աճին՝ հասցնելով այն վերջին 19 տարվա նոր առավելագույն ցուցանիշին։

CME FedWatch-ի տվյալներով՝ շուկան 70,3% հավանականությամբ է գնահատում այն, որ ԱՄՆ Կենտրոնական բանկը հոկտեմբերին կայանալիք նիստում կբարձրացնի հիմնական տոկոսադրույքը։ Մեկ շաբաթ առաջ այդ հավանականությունը գնահատվում էր 57,6%։

Ներդրողների ուշադրությունն այս շաբաթ ուղղված կլինի ԱՄՆ վիճակագրական տվյալներին։ Չորեքշաբթի կհրապարակվի ամերիկացիների օգոստոսյան եկամուտների և ծախսերի մասին զեկույցը, որը ներառում է PCE և Core PCE ինդեքսները․ դրանցով է Դաշնային պահուստային համակարգն առաջնորդվում գնաճի դինամիկան գնահատելիս։ Ուրբաթ օրը կհրապարակվեն ԱՄՆ-ում սեպտեմբեր ամսվա գործազրկության վերաբերյալ տվյալները։

Dow Jones ինդեքսի բաղադրիչների շարքում անկման առաջատարը Boeing Co. ավիաշինական ընկերությունն էր, որի կապիտալիզացիան նվազեց 6,9%-ով՝ այն լուրերից հետո, որ ԱՄՆ Քաղաքացիական ավիացիայի դաշնային վարչությունը (FAA) կհետաձգի Boeing 737 MAX 10 ինքնաթիռի հավաստագրումը մինչև ծրագրային ապահովման հետ կապված վերջերս հայտնաբերված խնդրի վերացումը։

S&P 500-ի կազմում ամենամեծ կորուստները կրել է պինդ օքսիդային վառելիքային էլեմենտներով աշխատող էներգետիկ կայանքների մատակարար Bloom Energy ընկերությունը (-9%)։

DoorDash-ի բաժնետոմսերն էժանացել են 7,7%-ով, Qualcomm Inc.-ինը՝ 7,2%-ով, Carvana Co.-ինը՝ 7,1%-ով, Intel Corp.-ինը՝ 5,7%-ով, Meta-ինը՝ 4,8%-ով, Regeneron Pharmaceuticals-ի և Coherent Corp.-ինը՝ 4,5%-ով, Salesforce Inc.-ինը՝ 2,9%-ով, International Business Machines-ինը՝ 2,2%-ով, Goldman Sachs Group-ինը՝ 2,1%-ով, JPMorgan Chase & Co.-ինը՝ 1,9%-ով, Amazon.com Inc.-ի և Microsoft Corp.-ինը՝ 1,4%-ով։

Tesla-ի շուկայական արժեքը նվազել է 3,9%-ով այն բանից հետո, երբ J.P.Morgan-ի վերլուծաբանները ցածրացրել են էլեկտրամեքենաներ արտադրող ընկերության բաժնետոմսերի թիրախային գինը՝ նշելով երրորդ եռամսյակում մատակարարումների ցածր ցուցանիշները։

Միևնույն ժամանակ Nvidia Corp.-ի բաժնետոմսերի գինն աճել է 1,7%-ով։ Ընկերությունը հայտարարել է բաժնետոմսերի հետգնման ծրագիրը 150 միլիարդ դոլարով ընդլայնելու և մինչև 235 միլիարդ դոլարի հասցնելու մասին։

Դրական դինամիկա են արձանագրել Palo Alto Networks (+4,6%), Paramount Skydance Corp. (+3,2%), CrowdStrike Holdings (+2,8%), Everpure Inc. (+2,7%), Viatris Inc. (+2,5%), Intuitive Surgical (+2,4%), Procter & Gamble Co. (+1,9%), Nike Inc. (+1,8%), Sherwin-Williams Co. (+1,1%) և Chevron Corp. (+0,9%) ընկերությունների բաժնետոմսերի գնանշումները։

Dow Jones Industrial Average ինդեքսն ընկել է 0,67%-ով՝ հասնելով 51481,51 կետի։

Standard & Poor's 500-ի ցուցանիշը նվազել է 0,77%-ով՝ հասնելով 7683,69 կետի։

Nasdaq Composite ինդեքսը կորցրել է 0,92% և փակվել 26820,38 կետի վրա։