Եվրամիությունը պետք է սպառողներին պաշտպանի էներգակիրների գների նոր կտրուկ աճից՝ միաժամանակ շարունակելով նվազեցնել կախվածությունը հանածո վառելիքից։ Դրա մասին Դուբլինում ԵՄ երկրների էներգետիկայի նախարարների հանդիպման ժամանակ հայտարարել է էներգետիկայի հարցերով եվրահանձնակատար Դան Յորգենսենը, հաղորդում է Euronews-ը։

Յորգենսենի ասելով՝ ներկայում Եվրամիությանը էներգառեսուրսների անմիջական պակաս չի սպառնում, սակայն բարձր գները կարող են համադրելի սոցիալական հետևանքներ ունենալ։ Նա նշել է, որ Եվրոպայի գրեթե 50 միլիոն բնակիչ արդեն սովորական ձմռանը չեն կարողանում լիարժեք ջեռուցել իրենց տները։

Եվրահանձնակատարն աջակցել է Ֆրանսիայի նախագահ Էմանուել Մակրոնի առաջարկին՝ ժամանակավորապես մեղմելու նավթավերամշակմանը ներկայացվող որոշ պահանջներ, որպեսզի ավելացվի դիզելային վառելիքի և այլ նավթամթերքների արտադրությունը։ Միաժամանակ Միջազգային էներգետիկ գործակալության ղեկավար Ֆաթիհ Բիրոլը հայտարարել է, որ ռազմավարական պաշարներից նավթի նոր լայնածավալ բացթողումն առայժմ առաջնահերթ միջոց չէ։ Նրա գնահատմամբ՝ երկրներն արդեն օգտագործել են պաշարների մոտ 20%-ը՝ պահպանելով մոտ 80%-ը։

Եվրահանձնաժողովը մտադիր է նաև մեկ տարով հետաձգել ներմուծմանը վերաբերող ԵՄ մեթանի պահանջների մի մասի ուժի մեջ մտնելը։ Յորգենսենը շեշտել է, որ խոսքը կլիմայական նպատակներից հրաժարվելու մասին չէ, այլ կանոնների ժամանակավոր ճշգրտման՝ էներգետիկ շուկայի վրա ճնշումը նվազեցնելու համար։

Երկարաժամկետ հեռանկարում Բրյուսելը մտադիր է արագացնել անցումը վերականգնվող էներգիայի աղբյուրներին, էլեկտրաֆիկացմանն ու էներգաարդյունավետության բարձրացմանը։ Յորգենսենը ԵՄ երկրներին կոչ է արել ժամանակավոր աջակցության միջոցները չվերածել հանածո վառելիքի մշտական սուբսիդիաների։

Մյուս խնդիրներից մեկը մնում է էլեկտրաէներգիայի արժեքը։ Յորգենսենն ու Բիրոլը կոչ են արել վերանայել հարկային համակարգերը, որոնց պայմաններում էլեկտրաէներգիան կարող է հարկվել ավելի բարձր, քան գազը։ Նրանց կարծիքով՝ դա խանգարում է տնային տնտեսություններին և բիզնեսին գազից ու նավթից անցնել էլեկտրաէներգիայի։

Միաժամանակ Եվրահանձնաժողովը չի ծրագրում էներգետիկ ընկերությունների գերշահույթի նկատմամբ համաեվրոպական հարկ սահմանել՝ երկրներին թողնելով ԵՄ օրենսդրության շրջանակում ազգային միջոցներ կիրառելու հնարավորությունը։

Առանձին մտահոգություն է առաջացնում նաև գազի պաշարների մակարդակը։ ԵՄ գործող կանոնները նախատեսում են պահեստարանների լցվածություն 80% մակարդակով։

Յորգենսենը երկրներին կոչ է արել ապահովել այս ցուցանիշը՝ նախազգուշացնելով, որ զգալի հետ մնալը կարող է մինչև գազի մղման հաջորդ սեզոնը հանգեցնել պաշարների նվազման։