նախընտրելի դարձնել
ԱՄՆ ներգաղթի դատարանը թույլատրել է արտաքսել Սալահ Սարսուրին՝ ծագումով պաղեստինցի և Վիսկոնսինի ամենախոշոր մզկիթի ղեկավարին՝ նրան ճանաչելով երկրի արտաքին քաղաքականության և ազգային անվտանգության համար սպառնալիք։ Միևնույն ժամանակ դատավորը մերժել է իշխանությունների մեղադրանքը, ըստ որի Սարսուրը ստել է գրին քարտ ձևակերպելիս, հաղորդում է Associated Press-ը։
Սարսուրը, որը ղեկավարում է Միլուոքիի Իսլամական հասարակությունը, մարտին ձերբակալվել էր ԱՄՆ ներգաղթի և մաքսային ոստիկանության (ICE) աշխատակիցների կողմից։ Հունիսին դաշնային դատավորը կարգադրել էր ազատ արձակել նրան կալանքից՝ նշելով, որ Սարսուրը ներկայացրել է ծանրակշիռ հիմքեր ենթադրելու, որ Դոնալդ Թրամփի վարչակազմը հետապնդում է իրեն պաղեստինցիների իրավունքների հրապարակային պաշտպանության և Իսրայելի քննադատության համար։ Այժմ Սարսուրը մտադիր է բողոքարկել ներգաղթի դատարանի որոշումը։
ԱՄՆ իշխանությունները սպառնալիք են համարում Իսրայելում նրա վաղեմի դատվածությունները։ Սարսուրը ծնվել է Իսրայելի կողմից օկուպացված Արևմտյան ափում և 1988 թվականին բանտարկվել էր Իսրայելում, երբ խոստովանել էր, որ քարեր և այրվող խառնուրդով շիշ է նետել իսրայելցի զինվորականների ուղղությամբ։ 1995 թվականին նրան մեղավոր էին ճանաչել զենք և զինամթերք ձեռք բերելու փորձի համար։ Ինքը՝ Սարսուրը, հերքում է այդ հանցագործությունների կատարումը, իսկ նրա փաստաբանները պնդում են, որ խոստովանական ցուցմունքները կորզվել են խոշտանգումների և հարկադրանքի միջոցով։
ԱՄՆ-ում Սարսուրն ապրում է 1993 թվականից և ամերիկյան դատվածություններ չունի։ Նրա պաշտպանության պատմելով՝ ամերիկյան ներգաղթի մարմինները դեռևս երկրի մուտքի պահից գիտեին Իսրայելում նրա անցյալի մասին։ Ներգաղթի դատավոր Ջեյմ Սալինարդյուն վաղեմի մեղադրանքները ճանաչել է արտաքսման հիմք, սակայն չի համաձայնել կառավարության պնդման հետ, թե Սարսուրը թաքցրել էր դրանք գրին քարտ ստանալիս։
Սարսուրը հայտարարել է, որ Արևմտյան ափ արտաքսումն իր համար կնշանակի «կյանքի վերջ»։ Նրա փաստաբանները պնդում են նաև, որ ICE-ի կալանքի տակ գտնվելու ընթացքում նա կորցրել է ավելի քան 14 կիլոգրամ։ Նրանք հավելել են, որ Սարսուրը ունի երկրորդ տիպի շաքարախտ, իսկ արյան մեջ շաքարի մակարդակը ստուգել են ընդամենը ամիսը մեկ անգամ։
2025 թվականի հունիսին ԱՄՆ պետքարտուղար Մարկո Ռուբիոն հուշագիր է ուղարկել, որում նշել է, որ Սարսուրը կարող է արտաքսվել երկրից նույն հիմքերով, ինչ պաղեստինցի ակտիվիստներ Մահմուդ Խալիլը և Մոհսեն Մահդավին։
Սարսուրը հայտարարել է, որ կշարունակի պայքարել ԱՄՆ-ում մնալու իրավունքի համար, որտեղ ապրել է ավելի քան երեք տասնամյակ։ Նրա փաստաբան Պատրիկ Տորելը որոշումն անվանել է անարդար և հայտարարել, որ պաշտպանությունը մտադիր է այն բողոքարկել։
