Flydubai ավիաընկերությունը ժամանակավորապես դադարեցրել է բոլոր թռիչքները դեպի Իսրայել և Իսրայելից՝ Դուբայից Թել Ավիվ ուղևորվող ինքնաթիռում տեղի ունեցած միջադեպի հետաքննության ընթացքում, հաղորդում է The Times of Israel-ը։

Իսրայելի իշխանությունների և լրատվամիջոցների տվյալներով՝ օդաչուներից մեկը հարձակվել է մյուսի վրա և, ենթադրաբար, փորձել է իր ձեռքը վերցնել ինքնաթիռի կառավարումը։

«Այդ ժամանակավոր դադարեցումը համապատասխան մարմիններին հնարավորություն կտա շարունակել աշխատանքը և պարզել տեղի ունեցածի բոլոր հանգամանքները»,- հայտարարել է Flydubai-ի ներկայացուցիչը։

Ըստ նրա՝ ավիաընկերությունը լիովին համագործակցում է հետաքննության հետ և մտադիր է պահպանել անվտանգության ամենաբարձր չափանիշները իր ամբողջ երթուղային ցանցում։

«Մենք շարունակում ենք սերտորեն համագործակցել պետական մարմինների, կարգավորող կառույցների և օդանավակայանների ներկայացուցիչների հետ և կվերանայենք թռիչքների դադարեցման որոշումը՝ նոր տեղեկվությունների ստացմանը զուգընթաց»,- հավելել է ընկերության ներկայացուցիչը։

Միջադեպը տեղի է ունեցել սեպտեմբերի 30-ին՝ Flydubai-ի Դուբայ-Թել Ավիվ չվերթի ժամանակ։ Associated Press-ի տվյալներով՝ օդաչուներից մեկը թռիչքի ընթացքում հարձակվել է երկրորդ օդաչուի վրա։ Ինքնաթիռը կտրուկ իջել է մոտ 10 կիլոմետր բարձրությունից մինչև մոտ 5 կիլոմետր, ինչից հետո անձնակազմին և ուղևորներին հաջողվել է վերահսկողության տակ վերցնել իրավիճակը։ Օդանավը վթարային վայրէջք է կատարել Սաուդյան Արաբիայի հյուսիս-արևմուտքում գտնվող Տաբուկում։

Իսրայելի իշխանությունները տեղի ունեցածը դիտարկում են որպես ինքնաթիռի առևանգման հնարավոր փորձ և հետաքննում են հարձակման հանգամանքները։ Միևնույն ժամանակ, երկրորդ օդաչուի գործողությունների շարժառիթը դեռևս պաշտոնապես չի հաստատվել։ Reuters-ը հայտնում է, որ միջադեպից հետո Իսրայելը մտադիր է միաժամանակ խստացնել երկիր թռիչքներ իրականացնող օդաչուների ստուգումները։

Բոլոր ուղևորներն ու անձնակազմի անդամները տեղափոխվել են անվտանգ վայր։ Flydubai-ն ընդգծել է, որ թռիչքների դադարեցման մասին որոշումը ժամանակավոր բնույթ է կրում և կվերանայվի հետաքննությունից լրացուցիչ տվյալներ ստանալուց հետո։