Հայաստանում արդեն որոշ ժամանակ է, ինչ պարեկային ավտոմեքենաները ճանապարհներով և փողոցներով երթևեկում են առանց թարթող փարոսիկների։ Սկզբում դա նկատեցին քաղաքացիները, հատկապես վարորդները՝ ենթադրելով, թե նման քայլերի նպատակը իրավախախտների զգոնությունը թուլացնելն է։ Ավելի ուշ ՆԳՆ-ն հաստատեց այդ որոշումը։

Հիշեցնենք, որ պարեկներն առաջ էլ հիմնականում երթևեկում էին առանց ձայնային ազդանշանի, ինչը նախևառաջ պայմանավորված էր քաղաքացիներին ավելորդ անհանգստություն չպատճառելու ցանկությամբ։ Սակայն միացված թարթող փարոսիկը գրեթե միշտ առկա էր։ Առավել ևս, որ օրենսդրությունը պահանջում է լուսային կամ լուսային և ձայնային ազդանշանի առկայություն։ Կանոնների տեքստը տեղադրված է կայքում։ Հենց ՆԳՆ կայքում այդ տեքստը գտնել չհաջողվեց։

Հայաստանի ճանապարհային երթևեկության կանոնների IV գլխի (Հատուկ ազդանշանների կիրառումը) 26-րդ կետի համաձայն՝ կապույտ առկայծող փարոսիկով տրանսպորտային միջոցների վարորդները, ճանապարհային երթևեկության անվտանգությունն ապահովող անհետաձգելի ծառայողական խնդիրներ կատարելիս, կարող են չպահպանել Կանոնների II (բացառությամբ կարգավորողի ազդանշանների), V-XVI, XIX և XXI բաժինների պահանջները։ Երթևեկության այլ մասնակիցների նկատմամբ առավելություն ստանալու համար նրանք պարտավոր են միացնել կապույտ թարթող փարոսիկը և հատուկ ձայնային ազդանշանը, որը բարձր և ցածր տոների հաջորդականություն է և տարբերվում է տրանսպորտային միջոցների սովորական ձայնային ազդանշաններից։ Այդպիսի տրանսպորտային միջոցների վարորդները կարող են օգտվել այդ առավելությունից միայն այն պայմանով, որ իրենց ճանապարհ են զիջում։ Այս իրավունքից օգտվում են նաև այն վարորդները, որոնց տրանսպորտային միջոցներն ուղեկցվում են կապույտ և կարմիր թարթող փարոսիկ և հատուկ ձայնային ազդանշան ունեցող տրանսպորտային միջոցներով։

27. Հայաստանի Հանրապետության ճանապարհային ոստիկանության, Հայաստանի Հանրապետության ոստիկանության պարեկային ծառայության, Հայաստանի Հանրապետության պետական պահպանության ծառայության և Հայաստանի Հանրապետության պաշտպանության նախարարության ռազմական ճանապարհային ոստիկանության տրանսպորտային միջոցների վրա նույնպես կարող է միացվել կարմիր թարթող փարոսիկ։

Նույն գլխի 28-րդ կետում ասվում է. Կապույտ թարթող փարոսիկ և հատուկ ձայնային ազդանշան ունեցող տրանսպորտային միջոցի մոտենալու դեպքում վարորդները պարտավոր են ճանապարհ զիջել՝ նշված տրանսպորտային միջոցի անարգել անցումն ապահովելու համար։

29. Կապույտ և կարմիր թարթող փարոսիկներով ևհատուկ ձայնային ազդանշանով տրանսպորտային միջոցին մոտենալիս վարորդները պետք է նվազեցնեն արագությունը և ճանապարհ զիջեն նշված տրանսպորտային միջոցին, ինչպես նաև այն ուղեկցող տրանսպորտային միջոցներին՝ անարգել անցումն ապահովելու համար։

30. Կապույտ կամ կապույտ և կարմիր թարթող փարոսիկներով անշարժ տրանսպորտային միջոցին մոտենալիս վարորդները պետք է նվազեցնեն արագությունը, որպեսզի անհրաժեշտության դեպքում անմիջապես կանգ առնեն։

31. Կարմիր թարթող փարոսիկով անշարժ տրանսպորտային միջոցին մոտենալիս տվյալ ուղղությամբ ընթացող տրանսպորտային միջոցների վարորդները պետք է կանգ առնեն և շարունակեն երթևեկությունը միայն թույլտվություն ստանալուց հետո։

Ինչպես ցույց են տալիս վերը բերված բոլոր կետերը, ճանապարհին առավելությունն ապահովվում է հենց թարթող փարոսի առկայությամբ։ Թե ինչով են առաջնորդվել ՆԳՆ-ում՝ որոշելով, որ հայրենական վարորդներն օժտված են առանց թարթող փարոսիկների ընթացող և ՃԵԿ-ն ակտիվորեն խախտող պարեկների մտադրությունները կանխատեսելու և նրանց մտքերը կարդալու տաղանդով՝ այնքան էլ հասկանալի չէ։ Հստակ է մի բան՝ փարոսիկների օգտագործումը դադարեցնելու որոշումը ոչ միայն կհանգեցնի ծանր ճանապարհատրանսպորտային պատահարների աճի, այլև պարզապես չի համապատասխանում Ճանապարհային երթևեկության կանոններին։

Մարիամ Լևինա