նախընտրելի դարձնել
Ճապոնական ավտոարտադրողներ Toyota-ն և Honda-ն հայտարարել են Թաիլանդում իրենց գործարանների աշխատանքի դադարեցման մասին՝ լայնածավալ ջրհեղեղի պատճառով։ Ընկերությունների որոշման մասին հայտնել է The Nation թերթը։
«Ընկերությունը ժամանակավորապես դադարեցնում է Պրաչինբուրիում և Այութհայայում գտնվող գործարանների աշխատանքը 2026 թվականի հոկտեմբերի 2-ից 6-ն ընկած ժամանակահատվածում, քանի որ բաղադրիչների մատակարարները չեն կարողացել ավտոմեքենաների արտադրության համար անհրաժեշտ մասերը հասցնել ջրհեղեղի պատճառով, մասնավորապես՝ Չոնբուրի և Ռայոնգ նահանգներից», - պարբերականը մեջբերել է Թաիլանդում Honda-ի ստորաբաժանման ղեկավար Կոձի Իվանամիի խոսքերը։
Թերթի տեղեկացմամբ՝ Toyota Motor-ի թաիլանդական ստորաբաժանումը դադարեցրել է իր երեք հավաքման արտադրամասերի գործունեությունը Սամութպրական և Չաչենգսաու նահանգներում։ Բացի այդ, որոշվել է փակել Toyota Auto Works դուստր ընկերության հավաքման արտադրամասը։ Ընկերությունը որպես մատակարարումների խափանման պատճառ նշել է ջրհեղեղը և հայտարարել, որ դադարները ժամանակավոր բնույթ են կրում, մինչև գտնվեն փոխադրումների այլընտրանքային երթուղիներ։
Պարբերականը վկայակոչում է Թաիլանդի արդյունաբերության ֆեդերացիայի տվյալները, ըստ որոնց՝ ջրհեղեղի հետևանքով ավտոմոբիլային մատակարարման շղթայի խզման և հարակից ոլորտներում կորուստները կազմել են 1,018 միլիարդ թաիլանդական բատ (մոտ 30 մլն դոլար)։
Թաիլանդում ջրհեղեղների հետևանքներն ազդել են ավելի քան 2,6 միլիոն բնակչի վրա, տարերքի զոհ է դարձել 40 մարդ։ Ջրհեղեղային իրավիճակը սրվել է սեզոնային մուսոնային անձրևների ֆոնին։ Սեպտեմբերի 26-ին Բանգկոկում երկարատև հորդառատ անձրևների պատճառով հայտարարվել էր աղետի ռեժիմ, տարերքը հարվածել է շուրջ 329 հազար տնային տնտեսությունների կամ մոտ 700 հազար մարդու։ Մայրաքաղաքում ջուրը ներկայում հիմնականում հետ է քաշվել անձրևների դադարից հետո։ Մի քանի ճանապարհներ դեռ մնում են ջրով ծածկված, տեղի իշխանությունները խորհուրդ են տալիս շրջանցել դրանք։
