Պերուի ինկերի Սրբազան հովտում՝ Մաչու Պիկչու տանող գլխավոր երթուղուց ոչ հեռու, անտառային հրդեհը տարեց մի մարդու կյանք է խլել և ևս երկու մարդու վնասվածքներ պատճառել, հայտնում է AFP-ն։

Ուրբաթ օրը սկսված հրդեհը ուժեղ քամու, չոր բուսականության և բարձր ջերմաստիճանի պատճառով արագ տարածվել է։

Հրդեհը բռնկվել է Կուսկո շրջանում գտնվող Յանաուարա բնակավայրի տարածքում՝ Օլյանտայտամբոյից ոչ հեռու, որը կայարան է, որով անցնում է հայտնի ինկյան միջնաբերդ ուղևորվող զբոսաշրջիկների զգալի մասը։ Տարածաշրջանային արտակարգ իրավիճակների կենտրոնի ղեկավար Միգել Օսկոն տեղեկացրել է, որ զոհվածը գտնվել է անմիջապես հրդեհի գոտում՝ փորձելով պայքարել կրակի դեմ։ Եվս երկու մարդ ստացել է երկրորդ աստիճանի այրվածքներ և հոսպիտալացվել է։

Իշխանությունների նախնական վարկածով, հրդեհի պատճառը կարող էր լինել բուսականության վերահսկվող այրումը, որը տեղացի ֆերմերները օգտագործում են հողերը ցանքին նախապատրաստելու համար։ Սակայն չոր բուսականության և եղանակային պայմանների պատճառով կրակն արագորեն դուրս է եկել վերահսկողությունից։

Բոցը մոտեցել է այն ճանապարհին, որը զբոսաշրջիկներն օգտագործում են Մաչու Պիկչուի շրջան մեկնելու համար։ Իշխանությունները մտավախություն ունեին կրակի հետագա տարածման վերաբերյալ և օդային աջակցություն են խնդրել։ Հրդեհաշիջմանը մասնակցել է ավելի քան 150 բրիգադիր և մոտ 40 հրշեջ, սակայն ուժեղ քամին բարդացրել է ցամաքային ստորաբաժանումների աշխատանքը։

Սպառնալիքի պատճառով Սրբազան հովտի որոշ հյուրանոցներ հարկ է եղել տարհանել։ Իշխանությունները նաև հետևել են Մաչու Պիկչուի բուֆերային գոտու հարևանությամբ գտնվող բնական արգելոցի հատվածներին։

Մաչու Պիկչուն՝ XV դարում ինկերի կառուցած միջնաբերդը, գտնվում է Անդերում՝ ծովի մակարդակից մոտ 2500 մետր բարձրության վրա։ 1983 թվականին այն ընդգրկվել է ՅՈՒՆԵՍԿՕ-ի Համաշխարհային ժառանգության ցանկում։ Ամեն տարի մոտ երեք միլիոն զբոսաշրջիկ է այցելում հուշարձան։