նախընտրելի դարձնել
Ֆինլանդիայի նախագահ Ալեքսանդր Ստուբը իսպանական EL MUNDO թերթին տված հարցազրույցում հայտարարել է, որ չի տեսնում ՆԱՏՕ-ի երկրների վրա Ռուսաստանի հարձակման նախապատրաստության նշաններ, սակայն Եվրոպային կոչ է արել պատրաստ լինել շարունակվող հիբրիդային հարձակումներին, ներառյալ կիբեռրհարձակումները, դիվերսիաները և տեղեկատվական արշավները։
«Սպասո՞ւմ ենք, որ Ռուսաստանը կհարձակվի։ Պատասխանը՝ ոչ։ Մենք դրա որևէ ապացույց չունենք», — ասել է Ստուբը։ Ըստ նրա, եվրոպացի առաջնորդները պետք է տարբերակեն սպառնալիքի իրական մակարդակը իրադարձությունների հնարավոր զարգացման տարբեր սցենարներից և չտրվեն խուճապի։
Միևնույն ժամանակ, Ֆինլանդիայի նախագահը կարծում է, որ Ռուսաստանն արդեն հիբրիդային պատերազմ է վարում եվրոպական երկրների դեմ։ Նա նշել է, որ խոսքը վերաբերում է այնպիսի գործողությունների, որոնք տեղի են ունենում ավանդական զինված հակամարտությունից դուրս՝ կիբեռհարձակումների, դիվերսիաների, տեղեկատվական տարածքին միջամտության և, այսպես կոչված, «մոխրագույն գոտու» այլ գործողությունների մասին։
Ստուբը ընդգծել է, որ հեռավորությունն այլևս պաշտպանություն չի ապահովում նման սպառնալիքներից։ Որպես օրինակ նա նշել է Իսպանիան, որից Մոսկվան աշխարհագրորեն զգալիորեն ավելի հեռու է գտնվում, քան Ֆինլանդիայից։ Նրա համոզմամբ, ժամանակակից հիբրիդային պատերազմի պայմաններում հեռավորությունն այլևս նախկին նշանակությունը չունի։
«Կարելի է սպասել մշտական կիբեռհարձակումների», — ասել է Ֆինլանդիայի նախագահը՝ հավելելով, որ արդեն հարձակումների են ենթարկվում իսպանական բանկերը և այլ օբյեկտներ։
Ստուբը նաև հիշատակել է Բալթյան տարածաշրջանում տեղի ունեցած միջադեպերը, մալուխների վնասումը, ենթադրյալ դիվերսիաները և միգրացիոն ճնշման կիրառումը։ Ըստ նրա, եթե եվրոպական իշխանություններին հաջողվում է բացահայտել մեղավորներին, անհրաժեշտ է հրապարակայնորեն նրանց վրա դնել պատասխանատվությունը և հասնել հետևանքների։
Խոսելով Ռուսաստանի և ՆԱՏՕ-ի հնարավոր ռազմական բախման մասին՝ Ստուբը կրկին կոչ է արել չխառնել սցենարները և ընթացիկ սպառնալիքի գնահատականը։ Նա նշել է, որ Ֆինլանդիան ՆԱՏՕ-ի երկրների մեջ ունի Ռուսաստանի հետ ամենաերկար ցամաքային սահմանը և ուշադիր հետևում է տեղի ունեցողին։
«Մենք տեսնում ենք հենց այն, թե ինչ է Ռուսաստանը անելու կամ չանելու», — հայտարարել է նա՝ հավելելով, որ եթե իրավիճակի գնահատականը փոխվի, Ֆինլանդիան այդ մասին կտեղեկացնի դաշնակիցներին։
Պատասխանելով միջուկային զենքի կիրառման հնարավորության հիշատակմամբ ռուսաստանյան վերջին փաստաթղթի մասին հարցին՝ Ստուբը պաշտպանել է ՆԱՏՕ-ի գլխավոր քարտուղար Մարկ Ռյուտեի դիրքորոշումը։ Նա նշել է, որ դաշինքը պաշտպանական է և չի սպառնում Ռուսաստանին, ուստի Մոսկվան պետք է դադարեցնի ՆԱՏՕ-ի հասցեին հնչող միջուկային սպառնալիքները։
