Անգլիայի և Ուելսի Կանաչների կուսակցությունը ընդունել է բանաձև, ըստ որի սիոնիզմը պետք է դիտարկել որպես ռասիզմի ձև, և հանդես է եկել պատմական Պաղեստինի ամբողջ տարածքում միասնական ժողովրդավարական պետություն ստեղծելու օգտին, հայտնում է The Guardian-ը։

Որոշումը պառակտում է առաջացրել կուսակցության ներսում և կարող է դառնալ իրավական քննության առարկա։

Բանաձևը, որն ընդունվել է կուսակցության Բրայթոնում կայացած համաժողովում՝ 1 022 ձայնով ընդդեմ 813-ի, սահմանում է սիոնիզմը որպես քաղաքական գաղափարախոսություն, որը, փաստաթղթի հեղինակների կարծիքով, ենթադրում է մեկ էթնիկ խմբի արտոնություններ մյուսի հաշվին։ Կուսակցությունը հայտարարել է, որ սիոնիզմը կդիտարկի այնպես, ինչպես ռասիզմի մյուս ձևերը։

Համայնքների պալատում կուսակցության հինգ պատգամավորներից չորսը հանդես են եկել բանաձևի դեմ։ Ադրիան Ռեմզին և Էլի Չոունսը հայտարարել են, որ խորապես վշտացած են որոշումից, իսկ Սիան Բերին և Կառլա Դենայրը խոստացել են աջակցել կուսակցության հրեա անդամներին, եթե նրանք նոր քաղաքականության պատճառով բախվեն ճնշման կամ հետապնդման։

Միաժամանակ մերժվել է այն ուղղումը, որը կարգելեր բանաձևը օգտագործել կուսակցության անդամների վրա ճնշում գործադրելու համար՝ սիոնիզմին աջակցող հրեական կազմակերպություններին նրանց պատկանելության պատճառով։ Սա մտահոգություն է առաջացրել կուսակցության որոշ հրեա անդամների մոտ, այդ թվում նաև այն պատճառով, որ բազմաթիվ սինագոգներ և այլ հրեական կազմակերպություններ կապված են սիոնիստական շարժման հետ։ Jewish Greens խումբը ավելի վաղ հայտնել էր իր անդամների միջև բանաձևի շուրջ լուրջ տարաձայնությունների մասին։

Կուսակցության առաջնորդ Զաք Պոլանսկին, որը չի մասնակցել քվեարկությանը՝ Լոնդոնի Հոլբորն և Սենթ Փանքրաս ընտրատարածքում նախընտրական արշավի պատճառով, քննադատության է ենթարկվել հարցի վերաբերյալ ոչ բավարար հստակ դիրքորոշման համար։ BBC-ի հարցին, թե արդյոք նա սիոնիզմը համարում է ռասիզմ, Պոլանսկին պատասխանել է, որ ընդունված բանաձևում այն սահմանվում է պաղեստինյան ժողովրդի «տեղահանության և ցեղասպանության» միջոցով, ինչը, ըստ նրա, ռասիզմ է։

Բանաձևը առաջ է մղել Greens for Palestine խումբը։ Համաժողովից առաջ այն մարդկանց կոչ էր անում միանալ կուսակցությանը՝ փաստաթղթի ընդունմանը աջակցելու համար։

Այժմ կուսակցության որոշ անդամներ դիտարկում են որոշումը իրավական կարգով վիճարկելու հնարավորությունը։ Բարիսթեր Ադամ Վագները հայտարարել է, որ առկա է 2010 թվականի Հավասարության մասին օրենքը խախտելու լուրջ ռիսկ, քանի որ նոր քաղաքականությունը, նրա կարծիքով, կարող է հանգեցնել սիոնիստական համոզմունքներ ունեցող մարդկանց նկատմամբ խտրականության կամ հետապնդման։ Նրա կարծիքով, լայն իմաստով սիոնիզմը՝ որպես հրեական ազգային պետության աջակցության ձև, հավանաբար կարող է դիտարկվել որպես օրենքով պաշտպանվող համոզմունք։

Մեծ Բրիտանիայի առաջադեմ հուդայականության շարժումը ընդունված բանաձևը բնութագրել է որպես հակասեմական՝ թե՛ ձևակերպմամբ, թե՛ մտահղացմամբ, հայտարարելով, որ հրեաների ինքնորոշման իրավունքը ռասիզմ ճանաչելը վտանգում է սիոնիստական հայացքներ ունեցող հրեաների հավասար մասնակցությունը կուսակցությանը։