նախընտրելի դարձնել
Ֆրանսիայի վարչապետ Սեբաստիեն Լըկոռնյուն երեքշաբթի հայտարարել է, որ «բռնությանը տեղ չի կարող լինել»՝ ամբողջ երկրում դպրոցականների զանգվածային բողոքների ֆոնին, հաղորդում է Ֆրանսպրես գործակալությունը։
Տասնյակ հազարավոր աշակերտներ դուրս են եկել փողոց՝ բողոքելով ֆրանսիական դպրոցների վիճակի դեմ։
«Դպրոց հրկիզելը չի բարելավում դպրոցական շենքերի վիճակը։ Ուսուցչի վրա հարձակվելը չի օգնում փոխարինել ուսուցիչներին»,- ասել է Լըկոռնյուն խորհրդարանում։ Նա նաև սուտ է անվանել այն պնդումները, ըստ որոնց կառավարությունը կարգադրել է ճնշել բողոքները ոստիկանության միջոցով։
Վերջին օրերին բողոքի ակցիաների ընթացքում ձերբակալվել են հազարավոր մարդիկ, տասնյակները վիրավորվել են։ Մի շարք դեպքերում մասնակիցները դպրոցների մոտ հրկիզել են տարբեր առարկաներ և տարբեր իրեր նետել ոստիկանների ուղղությամբ։
Ձախակողմյան «Անհնազանդ Ֆրանսիա» (LFI) կուսակցությունը և որոշ իրավապաշտպան կազմակերպություններ ոստիկանությանը մեղադրել են բողոքի մասնակիցների նկատմամբ ուժի անհամաչափ կիրառման մեջ, այն դեպքում, երբ ցուցարարներից շատերն անչափահասներ են։
Մեկնաբանելով տուժած դպրոցականների մասին հաղորդումները՝ Լըկոռնյուն ընդունել է, որ «դժբախտ պատահարներ» հնարավոր են։
Միևնույն ժամանակ վարչապետը մեղադրել է LFI-ին՝ խորհրդարանում ամենախոշոր առանձին ձախ կուսակցությանը, «քաղաքական օրակարգ» ունենալու մեջ, որի նպատակն է «երկիրը քաոսի մեջ գցել» 2027 թվականի նախագահական ընտրություններից առաջ։
Լըկոռնյուն հայտարարել է նաև, որ ընթացիկ շաբաթվա ավարտը լիցեյներում սովորական դասեր չեն անցկացվի։ Վարչապետի բնորոշմամբ՝ դա դպրոցների տնօրեններին, ուսուցիչներին և աշակերտներին ժամանակ կտա քննարկելու իրավիճակը և լուծումներ փնտրելու յուրաքանչյուր ուսումնական հաստատության «ներքին ժողովրդավարության» շրջանակում:
