նախընտրելի դարձնել
Եմենի հութիները հայտարարել են Սաուդյան Արաբիայում մի շարք թիրախների վրա հարձակումների, այդ թվում՝ Էր Ռիադի Խալիդ թագավորի անվան միջազգային օդանավակայանի ուղղությամբ բալիստիկ հրթիռ արձակելու մասին։ Սաուդյան կողմը հայտնել է, որ հրթիռն օդում խոցվել է, փոխանցում է AFP գործակալությունը։
Հութիների ռազմական խոսնակ Յահյա Սարին չորեքշաբթի հայտարարել է, որ հրթիռն արձակվել է Էր Ռիադի օդանավակայանի ուղղությամբ և, ենթադրաբար, խաթարել է օդային հաղորդակցությունը։ Եմենի կառավարական ուժերին աջակցող սաուդյան կոալիցիան հայտնել է հրթիռը խոցելու մասին։
Հութիները նաև հայտարարել են, որ հարվածներ են հասցրել Ադենի օդանավակայանի շրջակայքում գտնվող ռազմական շարասյանը․ Ադենը Եմենի՝ միջազգայնորեն ճանաչված կառավարության ժամանակավոր մայրաքաղաքն է։ Պետական Saba գործակալությունը հաղորդել է օդանավակայանի ուղղությամբ հրթիռային և անօդաչու թռչող սարքերով (ԱԹՍ) իրականացված հարձակումների մասին։ Ըստ տրանսպորտի ոլորտի պատասխանատուների՝ հրթիռներից մեկն ընկել է թռիչքուղու մերձակայքում՝ Կահիրեից եկող չվերթի վայրէջքից ընդամենը մի քանի րոպե առաջ։ Արդյունքում ինքնաթիռն ուղղորդվել է Սաուդյան Արաբիայի Ջիդդա քաղաք։
Բացի այդ, հութիները հայտարարել են հրթիռներով և ԱԹՍ-ներով Աբհայի օդանավակայանին ու Խամիս-Մուշայթում գտնվող Խալիդ թագավորի անվան ավիաբազային հարվածելու մասին։ Նրանք պնդում են, որ բոլոր թիրախները խոցվել են։ Այս հայտարարություններն անկախ աղբյուրների կողմից դեռևս չեն հաստատվել։
Այս շաբաթվա ընթացքում արդեն երկրորդ անգամ է Էր Ռիադի օդանավակայանը դառնում հութիների հարձակումների թիրախ։ Ըստ Flightradar24 ծառայության տվյալների՝ օդանավակայանի վերևում օդային տարածքը մի քանի անգամ ժամանակավորապես փակվել է, սակայն Սաուդյան Արաբիայի իշխանությունները հրապարակայնորեն չեն հաստատել այդ լուրերը և ոչինչ չեն հայտնել օդանավակայանին հասցված հարվածների մասին։
Հարձակումների այս նոր ալիքը տեղի է ունենում Եմենի քաղաքացիական պատերազմի կտրուկ սրման ֆոնին։ Չորս տարի տևած զինադադարից հետո՝ հուլիսին, ռազմական գործողությունները վերսկսվել են, իսկ անցյալ ամիս հութիները գրավել են Կարմիր ծովի երկայնքով ձգվող՝ երկրի ողջ արևմտյան ափը։ Սաուդյան Արաբիայի գլխավորած միջազգային կոալիցիան օդային աջակցություն է ցուցաբերում Եմենի կառավարական ուժերին, որոնք անցել են հակահարձակման։
Հակամարտող կողմերը հայտարարում են իրենց ռազմական հաջողությունների մասին, սակայն այդ լուրերի անկախ ստուգումը դժվար է իրականացնել՝ արագ փոփոխվող իրավիճակի և ռազմական գործողությունների գոտիներ լրագրողների մուտքի սահմանափակումների պատճառով։
Չորեքշաբթի օրը Եմենի արևմուտքում տեղի ունեցած նոր բախումների հետևանքով զոհվել է առնվազն 62 զինվորական․ այս մասին AFP-ին հայտնել են երկու կողմերի ռազմական աղբյուրները։ Ըստ այդ տվյալների՝ զոհվածներից 37-ը հութիներ են եղել։
Պետական Saba գործակալությունը նաև հաղորդել է կառավարական ուժերի վերահսկողության տակ գտնվող Թայիզ քաղաքի ուղղությամբ հութիների հասցրած հրթիռային հարվածի մասին։ Ըստ գործակալության՝ վիրավորվել է հինգ խաղաղ բնակիչ։
ՄԱԿ-ի Միգրացիայի միջազգային կազմակերպության գնահատականներով՝ ռազմական գործողությունների վերջին ալիքն արդեն հանգեցրել է երկրի ներսում ավելի քան 200 հազար մարդու տեղահանման։ Կազմակերպությունը նախազգուշացրել է ֆինանսական միջոցների սղության մասին, որոնք խիստ անհրաժեշտ են աշխարհի ամենաաղքատ երկրներից մեկի՝ Եմենի բնակչությանն օգնելու համար։
