նախընտրելի դարձնել
ԱՄՆ Տեխաս նահանգում ի կատար է ածվել խանութի աշխատակցուհու սպանության համար մեղադրվող 46-ամյա Ջամաալ Հովարդի մահապատժի դատավճիռը։ Սա ԱՄՆ-ում իրականացված առաջին մահապատիժն է Թենեսիում Քրիստա Փայքի դատավճիռը ի կատար ածելու ձախողված փորձից հետո։ Այս մասին հոկտեմբերի 7-ին հայտնել է Associated Press (AP) գործակալությունը։
AP-ի փոխանցմամբ՝ Հովարդը դատապարտվել էր 2000 թվականին խանութի կողոպուտի ընթացքում 42-ամյա Վիկի Սվարթոուտի սպանության համար։ Քննության տվյալներով՝ նա կրակել էր կնոջ կրծքավանդակին։ Մահապատժից առաջ տղամարդը ներողություն է խնդրել սպանվածի հարազատներից, ինչպես նաև շնորհակալություն հայտնել իր ընկերներին ու մերձավորներին։
«Նա հավելել է, որ գտնվում է «հոգեկան ճիշտ վիճակում՝ խաղաղություն գտնելու և Տիրոջը հանդիպելու համար»։ Նա իր խոսքն ավարտել է հետևյալ բառերով․ «Ապրեք ու վայելեք կյանքը, խաղաղություն բոլորիդ»», — նշված է հրապարակման մեջ։
Հստակեցվում է, որ Հովարդին մահացու ներարկում են կատարել Հանթսվիլի բանտում։ Նրա մահը արձանագրվել է ընթացակարգը սկսելուց 19 րոպե անց։ Սա 2026 թվականի սկզբից ի վեր Տեխասում իրականացված 6-րդ մահապատիժն էր և 30-րդը՝ ԱՄՆ-ում։ Ընթացիկ տարում նահանգում նախատեսված է ևս երկու մահապատիժ։
Հոդվածում նշվում է, որ Հովարդի փաստաբանները մինչ դատավճռի ի կատար ածումը փորձել են հասնել դրա հետաձգմանը՝ վկայակոչելով, ի թիվս այլնի, նրա մտավոր զարգացման հնարավոր շեղումները և մահացու ներարկման դեղամիջոցների որակի հետ կապված հարցերը։ ԱՄՆ Գերագույն դատարանը և Տեխասի դատարանները, սակայն, մերժել են այդ միջնորդությունները։
