նախընտրելի դարձնել
Մեծ Բրիտանիայում Լատվիայի երկու քաղաքացի են ձերբակալվել Քեմբրիջշիրում տեղակայված RAF Molesworth ավիաբազայի տարածք ներթափանցելուց հետո, հայտնում է BBC News-ը։
Ոստիկանությունը հետաքննում է միջադեպը ազգային անվտանգության մասին օրենքի այն հոդվածով, որը վերաբերում է պահպանվող օբյեկտ ներթափանցելուն՝ երկրի շահերին վնաս հասցնելու ունակ նպատակով։
Տագնապը բարձրացրել է Մեծ Բրիտանիայի պաշտպանության նախարարության ռազմական ոստիկանության պարեկախումբը, որը չորեքշաբթի մոտ 22:00-ին բազայի մոտ հայտնաբերել էր լքված ավտոմեքենա։ Ռազմական ոստիկանության և Քեմբրիջշիրի ոստիկանության համատեղ որոնումներից մի քանի ժամ անց օբյեկտի ցանկապատի վրա փոքր վնասվածք է հայտնաբերվել։
36 և 32 տարեկան երկու տղամարդիկ, որոնք բնակվում են Մեծ Բրիտանիայում, ձերբակալվել են բազայի պարագծի ներսում։ Սկզբում նրանց մեղադրում էին պահպանվող օբյեկտ ապօրինի ներթափանցելու և գույքը վնասելու մեջ։ Ավելի ուշ տղամարդիկ լրացուցիչ ձերբակալվել են 2023 թվականի Ազգային անվտանգության օրենքի 4-րդ հոդվածով՝ արգելված տարածք ներթափանցելու համար այնպիսի նպատակով, որը կարող է ուղղված լինել Մեծ Բրիտանիայի շահերի դեմ։
Գործը հետաքննում է հակաահաբեկչական ոստիկանությունը։ Միևնույն ժամանակ իրավապահ մարմիններն առայժմ տեղի ունեցածը չեն կապում բրիտանական մեկ այլ ավիաբազայում՝ Գլոստերշիրում գտնվող RAF Fairford-ում տեղի ունեցած միջադեպի հետ, որը վերջին օրերին մեծ ուշադրություն է գրավել։
«Այս փուլում ոչինչ չկա, ինչը ցույց տար այս միջադեպի կապը անցյալ շաբաթ RAF Fairford-ում տեղի ունեցած իրադարձությունների հետ»,- հայտարարել է Լոնդոնի հակաահաբեկչական ոստիկանության ստորաբաժանման ղեկավար Հելեն Ֆլանագանը։ Ըստ նրա՝ հետաքննությունը գտնվում է ամենավաղ փուլում, իսկ քննությունը ուսումնասիրում է տղամարդկանց հնարավոր դրդապատճառները։
Ոստիկանությունը նաև երկու խուզարկություն է իրականացրել Փիթերբորոյի շրջանում գտնվող հասցեներում։
Բազայի մոտ լքված ավտոմեքենան ավելի վաղ դարձել էր A1(M) մայրուղում և մի քանի այլ ճանապարհներում երթևեկության ժամանակավոր սահմանափակման պատճառ։ Մեքենան զննել են պայթուցիկ սարքերի վնասազերծման մասնագետները, սակայն նրանք որևէ կասկածելի բան չեն հայտնաբերել։
RAF Molesworth-ը Հանթինգդոնից արևմուտք է՝ Նորթհեմփթոնշիրի սահմանի մոտ։ Բազայում տեղակայված է ՆԱՏՕ-ի հետախուզական կենտրոնը, իսկ 2024 թվականին ամերիկյան Ռազմական հետախուզության գործակալությունը սկսել է 556 միլիոն դոլար արժողությամբ համալիրի շինարարությունը, որը պետք է դառնա Եվրոպայում և Աֆրիկայում ամերիկյան ռազմական հետախուզության կենտրոնը։
