նախընտրելի դարձնել
Սպիտակ տան աշխատակազմի ղեկավար Սյուզի Ուայլսի դուստրը՝ Քեյթի Ուայլսը, այցելել է Բոսնիայի Սերբական Հանրապետություն և հայտնվել է այդ ինքնավարության ներքին գործերի նախարար Ժելկո Բուդիմիրի հետ լուսանկարում։ Նկարում Ուայլսը ձեռքին պահում է հրացան և Բուդիմիրի կողքին կանգնած է հրաձգարանում։
Լուսանկարը լայն տարածում է ստացել սոցիալական ցանցերում։ CBS News-ը հաստատել է դրա իսկությունը արբանյակային պատկերների, սոցիալական ցանցերից հրապարակումների և Սերբական Հանրապետության հյուսիսում գտնվող RIS հրաձգարանի այլ նյութերի օգնությամբ։ Հեռուստաալիքի տվյալներով՝ նկարը արվել է ամռանը, իսկ ինքը՝ Ուայլսը, տարածաշրջանում գտնվել է օգոստոսի կեսերին։
Ուայլսը Վաշինգտոնում գործող Continental Strategy լոբբիստական ընկերության գործընկեր է։ Ընկերության ներկայացուցիչը CBS News-ին հայտնել է, որ նա երկու օր անցկացրել է Բոսնիայում՝ ուղեկցելով ամերիկյան մի ընկերության, որը հրավիրվել էր տարածաշրջանում տեխնիկատնտեսական ուսումնասիրություն անցկացնելու համար։ Նրա ասելով՝ Ուայլսը ավելի քան երկու տարի զբաղվում է այդ ընկերության ռազմավարական հաղորդակցություններով և ԱՄՆ կառավարության ներկայացուցիչների հետ Սերբական Հանրապետությանն առնչվող հարցեր չի քննարկել։
Միևնույն ժամանակ, ամերիկյան օտարերկրյա գործակալների գրանցման մասին օրենքին (FARA) համապատասխան ներկայացված փաստաթղթերը ցույց են տալիս, որ Continental Strategy-ն 2026 թվականի սկզբից գրանցված է որպես Սերբական Հանրապետության լոբբիստ։ Փաստաթղթերում հիշատակվում է նաև ընկերության գործընկեր Ալեխանդրո Գարսիան՝ Դոնալդ Թրամփի նախագահական արշավի քաղաքական տնօրենի նախկին տեղակալը։ Ընկերությունում հայտարարել են, որ հենց Գարսիան է եղել միակ աշխատակիցը, որը Սերբական Հանրապետության հարցերով շփվել է ամերիկյան կառավարության հետ։
Սպիտակ տանն ընդգծել են, որ Սյուզի Ուայլսը աշխատանքային հարցեր չի քննարկում իր դուստրերի հետ։ Վարչակազմի ներկայացուցիչը հայտարարել է նաև, որ Ուայլսի հանդիպումը Ժելյկա Ցվիյանովիչի՝ Սերբական Հանրապետության առաջնորդ Միլորադ Դոդիկի մերձավոր դաշնակցի հետ, կազմակերպել էր Գարսիան, այլ ոչ թե Քեյթի Ուայլսը։
Պատմությունը լրացուցիչ ուշադրություն է ստացել ամերիկացի քաղաքական խորհրդատուների՝ Դոդիկի հետ կապերի մասին հաղորդումների ֆոնին։ Այս շաբաթ հայտնի դարձավ, որ հանրապետական ռազմավարներ Ջեյմս Բլերը և Քրիս Լաչիվիտան մեկնել էին Սերբական Հանրապետություն և օգնում էին Դոդիկի կուսակցությանը նախընտրական արշավում։ Ինքը՝ Թրամփը, հայտարարել է, որ չգիտեր, թե ում համար էին նրանք աշխատում, և սպառնացել է շահերի բախման դեպքում դադարեցնել նրանց հետ համագործակցությունը։
Դոդիկի գլխավորած Սերբական Հանրապետությունը սերտ հարաբերություններ է պահպանում Ռուսաստանի հետ։ Ինքը՝ Դոդիկը, վաղուց հանդես է գալիս տարածաշրջանի ինքնավարության ընդլայնման օգտին և բոսնիական իշխանությունների կողմից մեղադրվում է 1990-ականներին Բոսնիայում պատերազմին վերջ դրած Դեյթոնի համաձայնագրերը խաթարելու մեջ։ 2025 թվականին Բոսնիայի և Հերցեգովինայի դատարանը նրան մեղավոր է ճանաչել խաղաղության համաձայնագրի պայմանները խախտելու համար, ինչից հետո նա հեռացվել է պաշտոնից և ստացել պետական պաշտոններ զբաղեցնելու արգելք։
Թրամփի շրջապատի՝ Դոդիկի հետ կապերն արդեն դարձել են CBS News-ի առանձին հետաքննության առարկա։ Մասնավորապես, ուշադրություն է գրավել ավելի քան 1,5 միլիարդ դոլար արժողությամբ էներգետիկ նախագիծը, ինչպես նաև Դոդիկի դեմ ամերիկյան պատժամիջոցների չեղարկումը։
