նախընտրելի դարձնել
Իսրայելի վարչապետ Բենիամին Նեթանյահուն չորեքշաբթի հայտարարել է, որ նպատակահարմար չի համարում Իսրայելում հոկտեմբերի 27-ին նշանակված խորհրդարանական ընտրություններից առաջ Իրանին կանխարգելիչ հարված հասցնելը, հաղորդում է Reuters-ը։
Միաժամանակ նա Թեհրանին և նրա դաշնակիցներին զգուշացրել է, որ Իսրայելի վրա հարձակման դեպքում կոշտ պատասխան կստանան։ Դրա մասին կառավարության ղեկավարը հայտնել է իսրայելական Army Radio ռադիոկայանին տված հարցազրույցում։
«Մեզ համար դա անհարմար է, դա լավ չէ»,- պատասխանել է Նեթանյահուն՝ խոսելով կանխարգելիչ հարվածի հնարավորության մասին։ Այդպես նա մեկնաբանել է նաև քաղաքական հակառակորդների մեղադրանքները, որոնք պնդում են, թե վարչապետը ձգտում է քվեարկությունից առաջ ռազմական բախում հրահրել։
«Նույնիսկ եթե Իրանը մեր վրա հրթիռներ արձակի, ինձ կմեղադրեն»,- հայտարարել է Նեթանյահուն։ Միևնույն ժամանակ նա կրկնել է, որ Իսրայելը հզոր պատասխան հարված կհասցնի, եթե ենթարկվի հարձակման։ Վարչապետը չի հստակեցրել՝ արդյոք ընտրություններից հետո դիտարկո՞ւմ է կանխարգելիչ հարվածի հնարավորությունը, ինչպես նաև չի բացահայտել Իրանի հարցով Վաշինգտոնի հետ վերջերս անցկացված բանակցությունների մանրամասները։
ԱՄՆ-ն ու Իսրայելը փետրվարի 28-ին սկսել են հարվածներ հասցնել Իրանին, որից հետո Թեհրանը հարձակվել է Իսրայելի և Պարսից ծոցի երկրների վրա։ Հունիսից ի վեր Իսրայելն ու Իրանը ուղիղ հարվածներով չեն փոխանակվել։ Այս ֆոնին Նեթանյահուն հայտարարել է, որ Թեհրանի հետ կապված զինված խմբավորումները ևս կարող են փորձել հարձակվել Իսրայելի վրա մինչև ընտրությունները։
Պատասխանելով այն հարցին, թե Սաուդյան Արաբիան կարո՞ղ է արդյոք օգնել եմենցի հութիների հարձակումները հետ մղելու հարցում, Նեթանյահուն հրաժարվել է բացահայտել մանրամասները։ Նա նշել է միայն, որ Իսրայելի հաջողություններից հետո իրեն դիմում են Մերձավոր Արևելքի բազմաթիվ երկրներ։ Անցած շաբաթվա ընթացքում Սաուդյան Արաբիան բախվել է հութիների հաճախացած հարձակումներին։
Միևնույն ժամանակ Իսրայելի պաշտպանության նախարար Իսրայել Կացը, գտնվելով Հարավային Լիբանանում, «Հըզբոլլահ» շարժմանը սպառնացել է նոր հարվածներով և Նաբաթիայի շրջանի ու Լիտանի գետի տարածքներում տարածքային կորուստներով։
Նրա ասելով՝ այդ հողերը կարող են մտնել Իսրայելի մշտական անվտանգության գոտու մեջ։ Կացը հայտարարել է նաև, որ լարվածության սրացման դեպքում կտեղահանվի մոտ մեկ միլիոն շիա, իսկ Բեյրութում «Հըզբոլլահի» հենակետային շրջանները չեն մնա իսրայելական ուժերի անհասանելիության սահմաններից դուրս։
Իսրայելը ավիահարվածներ և ցամաքային գործողություն է իրականացնում Լիբանանի հարավում՝ զուգահեռաբար շարունակելով պատերազմը Իրանի դեմ։ Ռազմական գործողությունները սկսվել են, երբ «Հըզբոլլահը» կրակ է բացել Իսրայելի ուղղությամբ՝ ի պատասխան Թեհրանին հասցված հարվածների։ Հակամարտության հետևանքով Լիբանանի հարյուր հազարավոր բնակիչներ, հիմնականում շիաներ, ստիպված են եղել լքել իրենց տները։
