նախընտրելի դարձնել
ԱՄՆ նախագահ Դոնալդ Թրամփը «խայտառակություն» է անվանել Ուկրաինայի կողմից ռուսական նավթավերամշակման գործարանների վրա հարվածների վերսկսումը՝ հայտարարելով, որ նման հարձակումները նպաստում են էներգակիրների համաշխարհային բարձր գների պահպանմանը։ Այս մասին նա հայտնել է Newsmax հեռուստաալիքին տված հարցազրույցում։
Թրամփը հայտարարել է, որ համակրանք չի տածում Ուկրաինայի նախագահ Վլադիմիր Զելենսկու նկատմամբ և նրան համարում է բանակցությունների ավելի բարդ գործընկեր, քան Ռուսաստանի նախագահ Վլադիմիր Պուտինը։
«Զելենսկին այն մարդը չէ, որի հետ մենք պետք է գործ ունենանք», — հայտարարել է Թրամփը։ «Նա չի ուզում համաձայնագիր կնքել։ Նա ասում է, որ ուզում է պայմանավորվել, բայց իրականում դա չի ուզում։ Ոչ, ես Զելենսկու մեծ երկրպագուն չեմ», — ավելացրել է ԱՄՆ նախագահը։
Հինգշաբթի Ուկրաինան վերսկսել է հարվածները ռուսական նավթային ենթակառուցվածքների վրա՝ ընդհատելով հարձակումների կարճ դադարը։ Դա տեղի է ունեցել այն բանից հետո, երբ Զելենսկին Մոսկվային մեղադրել է ուկրաինական էներգետիկ օբյեկտների վրա հարվածները շարունակելու մեջ՝ չնայած Թրամփի հայտարարած հրադադարին՝ էներգետիկ ենթակառուցվածքների վերաբերյալ։
Ռուսաստանի պաշտոնյաների տվյալներով՝ ուկրաինական անօդաչու թռչող սարքերը հարձակվել են Ռյազանի մարզում գտնվող նավթավերամշակման գործարանի վրա՝ Մոսկվայից մոտ 290 կմ հարավ-արևելք։
Մեկնաբանելով նոր հարձակումները՝ Թրամփը հայտարարել է, որ դրանք նպաստում են էներգակիրների համաշխարհային գների աճին։ «Եթե դուք ինձ ասեք, որ Զելենսկին կրկին հարվածում է նավթավերամշակման գործարաններին, ապա միակ բանը, ինչին նա հասնում է, նավթի համաշխարհային գների բարձրացումն է», — ասել է ամերիկյան նախագահը։
«Ես կարծում եմ, որ դա խայտառակություն է։ Կան բազմաթիվ այլ թիրախներ… Կան շատ օբյեկտներ, որոնց կարելի է հարվածել», — շարունակել է նա։
«Բայց երբ դուք հարձակվում եք նավթավերամշակման գործարանների վրա, որտեղ արտադրում են դիզելային վառելիք, որն անհրաժեշտ է մեզ և ամբողջ աշխարհին, ապա դրանով աշխարհին լավ ծառայություն չեք մատուցում», — հավելել է Թրամփը։
Հարցին, թե արդյոք կհաջողվի ավարտել պատերազմը մինչև իր նախագահական ժամկետի ավարտը, Թրամփը լավատեսություն է հայտնել համաձայնության հասնելու հնարավորության վերաբերյալ, սակայն կրկին կասկածի տակ է դրել Զելենսկու՝ բանակցությունների պատրաստակամությունը։
«Պատերազմը պետք է շուտով ավարտվի։ Կարծում եմ՝ իրականում երկուսն էլ կցանկանային, որ այս ամենը ավարտվեր», — հայտարարել է նա։ «Բայց ինձ թվում է, որ Զելենսկու հետ պայմանավորվելը ավելի դժվար է, քան Պուտինի հետ», — ավելացրել է ԱՄՆ նախագահը։
Թրամփը դժվարությունների մի մասը պայմանավորված է համարել ռուս և ուկրաինացի առաջնորդների միջև անձնական փոխադարձ հակակրանքով։ «Ինչպես գիտեք, Պուտինը ատում է Զելենսկուն, իսկ Զելենսկին ատում է Պուտինին։ Երբ այդպիսի ատելություն կա, շատ դժվար է որևէ բանի շուրջ պայմանավորվել», — ասել է ամերիկյան նախագահը։
Թրամփը կրկին խոսել է Ուկրաինայում ընտրությունների մասին
Ամերիկյան առաջնորդը նաև բարձրացրել է Ուկրաինայում նոր ընտրություններ անցկացնելու հարցը՝ կասկածի տակ դնելով Զելենսկու նկատմամբ հանրային աջակցության պահպանումը շարունակվող պատերազմի ֆոնին։
«Ես կարծում եմ, որ ընտրությունները անհրաժեշտ են, որովհետև ոչ ոք ինձ չի ասում, որ ուկրաինացի ժողովուրդը գոհ է այն բանից, որ հրթիռները հարվածում են իր բազմաբնակարան շենքերին», — հայտարարել է Թրամփը։
