նախընտրելի դարձնելՀայաստանում մեկնարկել է Mining Armenia Forum 2026-ը, որը երրորդ տարին անընդմեջ անցկացվում է «Ռեսուրսներից՝ հնարավորություններ» կարգախոսով։ Այս տարվա ֆորումի նորույթներից մեկը կլինի արհեստական բանականության կիրառումը՝ քննարկումներն ամփոփելու և հանքարդյունաբերության զարգացման վերաբերյալ գործնական առաջարկներ պատրաստելու համար։
Զանգեզուրի պղնձամոլիբդենային կոմբինատի տնօրենների խորհրդի անդամ, ընկերության գլխավոր տնօրենի տեղակալ Արտյոմ Պետրոսյանը, ներկայացնելով նորամուծությունը, նշել է, որ նման միջոցառումների ավարտից հետո կուտակված գաղափարների և առաջարկների զգալի մասը մնում է չիրագործված։
Նրա խոսքով՝ այս խնդիրը ի հայտ էր եկել նաև նախորդ ֆորումում․ այն ժամանակ քննարկված բազմաթիվ հարցեր մինչ օրս շարունակում են արդիական մնալ։
«Մեր նպատակն է ֆորումի էներգիան վերածել կոնկրետ գործնական արդյունքի և այն ներկայացնել Հայաստանի Հանրապետության կառավարությանը», — հայտնել է Պետրոսյանը։
Դրա համար կազմակերպիչները ստեղծել են «Մինաս» անունը կրող գործիք, որը ֆորումի ընթացքում կվերլուծի ելույթներն ու քննարկումները։ Քննարկումների արդյունքներով այն կառանձնացնի հանքարդյունաբերության զարգացման երեք հիմնական խնդիր, դրանց լուծման երեք առաջարկ, ինչպես նաև միջազգային փորձը հաշվի առնելով՝ միջազգային փորձագետներից և ներդրողներից ստացված երեք հիմնական ազդակ։
Միջազգային փորձագետներ և ներդրումային հեռանկարներ
Ֆորումը կտևի երկու օր՝ հոկտեմբերի 16–17-ը, և կմիավորի հանքարդյունաբերության և կից ոլորտների շուրջ 50 ներկայացուցիչների, այդ թվում՝ միջազգային հանքարդյունաբերական ընկերություններ, ֆինանսական հաստատություններ, ներդրողներ, պետական կառույցների ներկայացուցիչներ, կայուն զարգացման փորձագետներ, տեխնոլոգիաների մատակարարներ, ակադեմիական համայնքի և քաղաքացիական հասարակության ներկայացուցիչներ։
Ծրագրով նախատեսված է նաև շուկաների վերլուծությամբ և ռեսուրսային հատվածի զարգացմամբ զբաղվող միջազգային կազմակերպությունների մասնակցությունը։
Resourcing Tomorrow-ը կազմակերպիչների հետ համատեղ կանցկացնի պանելային քննարկում՝ ռեսուրսային հատվածում ֆինանսավորում և ներդրումներ ներգրավելու թեմայով։ Wood Mackenzie-ը առանձին նստաշրջան կնվիրի շուկայական հնարավորություններին, ներդրումային ներուժին և մրցակցային գործոններին, որոնք որոշում են Հայաստանի գրավչությունը հանքարդյունաբերական ներդրումների համար։
S&P Global Energy-ը կանցկացնի առանձին նստաշրջան՝ նվիրված վերջին միտումներին, որոնք ազդում են համաշխարհային հանքարդյունաբերության ոլորտում կայուն զարգացման ցուցանիշների վրա, ինչպես նաև ներդրումային որոշումների կայացման ժամանակ համապատասխան գործոնների աճող դերին։
Այս տարի ֆորումն անցկացվում է COP17-ի՝ ՄԱԿ կենսաբազմազանության մասին կոնվենցիայի կողմերի համաժողովի նախաշեմին, որը տեղի կունենա Հայաստանում։ Կենսական նշանակություն ունեցող օգտակար հանածոների, էներգետիկ անցման, կենսաբազմազանության պահպանության և բնական ռեսուրսների պատասխանատու օգտագործման նկատմամբ աճող միջազգային ուշադրության ֆոնին երկիրը դառնում է հարթակ հանքարդյունաբերության ապագայի, տարածաշրջանային համագործակցության և ռեսուրսների կայուն յուրացման քննարկման համար։
Ֆորումը նաև նպատակ ունի նպաստել միջազգային գործարար կապերի հաստատմանը և փորձի փոխանակմանը։ Երկու օրվա ընթացքում մասնակիցները կկարողանան ոլորտի զարգացման հարցեր քննարկել ընկերությունների ներկայացուցիչների, ներդրողների, ֆինանսական կազմակերպությունների, տեխնոլոգիական ձեռնարկությունների, պետական կառույցների և տեղական ինքնակառավարման մարմինների ներկայացուցիչների հետ։
Mining Armenia Forum 2026-ը կազմակերպում են «Հանքարդյունաբերական ֆորում» զարգացման հիմնադրամը և Հայաստանի հանքարդյունաբերության և մետալուրգիայի ասոցիացիան։ Ֆորումի ռազմավարական հովանավորներն արդեն երրորդ տարին անընդմեջ Զանգեզուրի պղնձամոլիբդենային կոմբինատն ու Lydian Armenia-ն են։ Գլխավոր հովանավորներն են Ameriabank-ը և «Թեղուտ» ՓԲԸ-ն։
