Սպիտակ տան նախկին մամուլի քարտուղար Քեթի Զախարիան ուրբաթ երեկոյան հրապարակավ աջակցություն է հայտնել ԱՄՆ նախագահ Դոնալդ Թրամփին այն բանից հետո, երբ նա խորհուրդ էր տվել նրան վերանայել այդ պաշտոնում հետագա աշխատանքի վերաբերյալ իր որոշումը։

«Նախագահ Թրամփը բարի, հիասքանչ, մեծահոգի, ուշադիր, եռանդուն և աշխատասեր մարդ է։ Կուզենայի, որ ավելի շատ ամերիկացիներ գնահատեին նրան։ Ոչ ոք երբեք Ամերիկան այնքան հզոր չի դարձնի, ինչպես նա է դա արել և շարունակում է անել։

Ինձ համար պատիվ էր աշխատել նրա համար»,— գրել է Զախարիան X սոցիալական ցանցում։

Ուրբաթ Թրամփը լրագրողներին հայտնել է, որ խորհուրդ է տվել Զախարիային մտածել, թե արդյոք նա իսկապես ցանկանում է մնալ այդ պաշտոնում։ Նախագահի խոսքով՝ մամուլը նրա հետ «շատ դաժան» էր վարվում, և նա չէր ուզում, որ աշխատանքը նրան ավելորդ ապրումներ պատճառեր։ Միևնույն ժամանակ Թրամփը հայտարարել է, որ վերջնական որոշումը մնում է նրան։ Շուտով հայտնի է դարձել, որ Զախարիան լքում է պաշտոնը։

Զախարիան Սպիտակ տան մամուլի քարտուղար էր նշանակվել հոկտեմբերի 9-ին և աշխատանքի էր անցել հաջորդ շաբաթ։ Նրա պաշտոնավարումը տևել է ընդամենը մի քանի օր։

Զախարիայի առաջին և միակ մամուլի ասուլիսը քննադատության է արժանացել կարճ լինելու և անվստահ պատասխանների պատճառով։ Բացի այդ, նրա մասնագիտական որակավորումների վերաբերյալ հարցեր են առաջացել այն բանից հետո, երբ պարզվել է, որ նա չի հանձնել Կալիֆոռնիայում փաստաբանական արտոնագիր ստանալու քննությունը։