նախընտրելի դարձնել
Ամերիկացի մի քանի հանրապետական օրենսդիրներ քննադատել են ԱՄՆ նախագահ Դոնալդ Թրամփի որոշումը՝ Ռուսաստանի դեմ մի շարք նոր պատժամիջոցների կիրառումը կասեցնելու վերաբերյալ, որոնք նախատեսված էին սեպտեմբերին նրա ստորագրած օրենքով, գրել է The Hill-ը։
Քննադատությունը հնչել է այն բանից հետո, երբ Սպիտակ տան ղեկավարը ստորագրել է համապատասխան հրամանագիրը՝ վկայակոչելով ԱՄՆ ազգային շահերը։
«Սա վեր անպատասխանատվության բոլոր սահմաններից», — X սոցիալական ցանցում գրել է Հյուսիսային Կարոլինայից հանրապետական սենատոր Թոմ Թիլիսը։ Նա նաև հիշեցրել է, որ Սենատը օրենքն ընդունել է 86 ձայնով՝ 11-ի դեմ, և վարչակազմին մեղադրել է Ռուսաստանի նախագահ Վլադիմիր Պուտինին զիջումների գնալու մեջ։
«Սենատի կողմից 86-ը 11-ի դեմ ընդունված օրենքի կատարման ո՞ր մասն է անհասկանալի նախագահին և նրա խորհրդականներին։ Աններելի է, որ այս վարչակազմը կապիտուլյացիայի է ենթարկվում ռուս դիկտատորի առաջ, որն անօրինականորեն ներխուժել է Ուկրաինա և ամեն օր սպանում է խաղաղ բնակիչների», — հայտարարել է Թիլիսը։
Տեխասից սենատոր Ջոն Քորնինը նույնպես դեմ է հանդես եկել նախագահի որոշմանը։ Մեկնաբանելով տեղի ունեցածը՝ նա գրել է. «Լինդսին ցնցված կլիներ»։ Նա նկատի ուներ հանգուցյալ սենատոր Լինդսի Գրեհեմին, որի պատվին անվանվել է Ռուսաստանի և Իրանի դեմ պատժամիջոցների մասին օրենքը։ Նեբրասկայից հանրապետական կոնգրեսական Դոն Բեքոնը հայտարարել է, որ Թրամփի գործողությունները ոչ թե մոտեցնում են պատերազմի ավարտը, այլ երկարաձգում այն։
Սեպտեմբերին Թրամփի ստորագրած օրենքը նախատեսում է պատժամիջոցներ և լրացուցիչ մաքսատուրքեր ռուսական էներգակիրների խոշոր գնորդների, ինչպես նաև սահմանափակումները շրջանցելուն օգնող երկրների նկատմամբ։ Սակայն նախագահի հրամանագիրը թույլ է տալիս հրաժարվել փաստաթղթով նախատեսված մի շարք միջոցների կիրառումից։ Թրամփն այս որոշումը բացատրել է ԱՄՆ ազգային շահերով և հայտնել, որ Կոնգրես է ուղարկել համապատասխան հիմնավորումը։
Հրամանագրին դեմ են արտահայտվել նաև դեմոկրատները։ Սենատոր Ռիչարդ Բլյումենթալը որոշումն անվանել է «փոքրոգի և վախկոտ» ու հայտարարել, որ այն կապված չէ ազգային անվտանգության հետ, այլ ուղղված է Պուտինին հաճոյանալուն։ Կոնգրեսական Դոն Բայերն, իր հերթին, մեղադրել է նախագահին Ուկրաինային դավաճանելու և օրենսդիրների կամքն անտեսելու մեջ։
Որոշումն ընդունվել է Վաշինգտոնի և Մոսկվայի միջև վերջերս ձեռք բերված պայմանավորվածության ֆոնին, որը Ռուսաստանին թույլ է տվել դիզելային վառելիք վաճառել ամերիկյան և համաշխարհային շուկաներում։
Համաձայնագիրը քննադատության ալիք է բարձրացրել ինչպես դեմոկրատների, այնպես էլ հանրապետականների շրջանում։ Ուկրաինայի նախագահ Վլադիմիր Զելենսկին Փիրս Մորգանի հարցազրույցում հայտնել է, որ իրեն դավաճանված է զգում ԱՄՆ առաջնորդի որոշման պատճառով։
