Մեծ Բրիտանիայի վարչապետի ազգային անվտանգության հարցերով խորհրդական Ջոնաթան Փաուելը դիտարկում է պաշտոնից հեռանալու հնարավորությունն աճող ճնշման ֆոնին, որն առաջացել է նրա կնոջ՝ լրագրող և գրող Սառա Հելմի՝ երկրում արգելված Palestine Action շարժման մասին հրապարակումից հետո, հայտնել է The Telegraph թերթը՝ հղում կատարելով իրավիճակին ծանոթ աղբյուրներին։

Պարբերականի տվյալներով՝ Փաուելը բողոքել է «հյուծվածությունից և սթրեսից», իսկ նրա ընկերները պնդում են, որ նա վաղուց է խոսում հեռանալու մտադրության մասին։ Խորհրդականը պաշտոնապես հրաժարականի մասին չի հայտարարել։

Քննարկումների առիթ են դարձել Հելմի գրառումները X սոցիալական ցանցում։ Հինգշաբթի նա գրել է. «Աստված, օգնիր մեզ՝ գրողներիս, որոնք աջակցում են Պաղեստինին և Palestine Action-ին»։

Հրապարակումը հայտնվել է գրող Սալի Ռունիին քննադատող տեսանյութին ի պատասխան։ Նրա գրքերը Մեծ Բրիտանիայում հանվել են վաճառքից այն բանից հետո, երբ հայտնի է դարձել նրա աջակցությունը Palestine Action-ին։

Թեև Հելմը ուղիղ չէր հայտարարել, որ աջակցում է այդ կազմակերպությանը, նրա խոսքերն ընկալվել են որպես համերաշխության արտահայտություն։ Հրապարակումից հետո Լոնդոնի ոստիկանությունը ստուգել էր լրագրողի գրառումը, սակայն շաբաթ օրը հայտարարել է, որ միջոցներ չի ձեռնարկի. գրառումը չէր հասել այն շեմին, որն անհրաժեշտ է քրեական հետապնդման համար։

Palestine Action-ը պաղեստինամետ խումբ է, որն արգելված է Մեծ Բրիտանիայում։ Նրա կարգավիճակի և աջակիցների գործողություններին արձագանքի հարցը վեճեր է առաջացրել երկրում, այդ թվում՝ կազմակերպությանն աջակցություն հայտնած հանրային դեմքերի դեմ ձեռնարկված միջոցառումներից հետո։

Սկանդալի ֆոնին Փաուելի ապագան ազգային անվտանգության հարցերով խորհրդականի պաշտոնում դարձել է նոր քննարկումների առարկա։ Սակայն, ըստ The Telegraph-ի հրապարակման, առայժմ խոսքը միայն հնարավոր հեռանալու մասին է, ոչ թե արդեն ընդունված որոշման։